Deputetja e PDK-së, Vlora Çitaku, ka reaguar ndaj deklaratës së kryeministrit Albin Kurti, i cili ka thënë se Qeveria e tij ka qenë shembull dhe pa afera korruptive përgjatë një debati në Davos të Zvicrës.
Sipas Çitakut, pretendimet e Kurtitnuk përkojnë me realitetin, pasi disa nga ministrat e kabinetit të tij janë nën aktakuzë, teksavendi është përballur me afera multimilionëshe, shkruan Insajderi.
Ajo ka përmendur rastet që lidhen me rezervat shtetërore dhe tregtinë e energjisë, duke theksuar se qindra miliona euro janë dhënë përmes kontratave pa tender.
“Ndërkohë, disa nga ministrat e tij janë nën aktakuzë. Afera multimilionëshe. Nga rezervat shtetërore, deri te tregtia e energjisë. Qindra miliona të dhëna në kontrata pa tender. Vendin në terr e ki. S’ka ekonomi, s’ka energji. Po beso, Nagipi e Martini janë lehtësuar nga këto deklarata. Sepse sipas Kryeministrit, gjithçka qenka e pastër”, ka deklaruar Çitaku.
“E në të njëjtën kohë, ai vetë refuzon t’i përgjigjet thirrjes së Prokurorisë. Kjo nuk është shembull. Kjo nuk është përgjegjësi. Gënjeshtra pa kripë. Keq, Albin. Shumë keq”, përmbyll shkrimin Çitaku.
Çka tha Kurti në Davos?
Kryeministri në detyrë, Albin Kurti, tha se brenda kabinetit të tij qeveritar ka “rezistencë” për të mos “u kthyer” në korrupsion, për të cilin u ankua se e ka trashëguar nga qeverisjet e kaluara.
Në një bisedë me ish-ministrin britanik Rory Stewart në Shtëpinë e Kosovës në Davos, Kurti i tha atij se e ka të rëndësishme që ministrave të tij të mos i shkojë mendja në këtë drejtim.
“Ne e kemi trashëguar një situatë ku korrupsioni ishte endemik. Ka rezistencë e qëndrueshmëri të fortë të njerëzve që të mos kthehen kurrë më aty. Pra, shpresa jonë janë njerëzit, që njerëzit do ta njoftojnë sistemin dhe publikun për korrupsionin që e shohin. Kjo është e para. E dyta është se ne duhet të udhëheqim me shembuj. Është shumë e rëndësishme që askush, absolutisht askush, brenda kabinetit ministror, të mos ketë imagjinatën më të vogël për t’u përfshirë në korrupsion.
Ai tha se për këtë çështje Kosova është një vend i monitoruar nga komuniteti ndërkombëtar, por edhe “nga vetë sistemi ynë”.
“Unë shpresoj që llogaridhënia do të zë vend dhe sinjalizuesit të na bëjnë të shurdhër, ndërsa fishkëllojnë nëse ndodh diçka e ngjashme me korrupsionin”.
