Presidenti i Francës, Emmanuel Macron, po qëndron në Davos për Forumin Ekonomik Botëror. Atje, ai u pyet edhe për temën ndoshta “më të nxehtë” të politikës globale aktualisht – Grenlandën.
Pas fjalimit të tij në Davos, presidenti francez u pyet nga një reporter i televizionit publik danez DR se cila do të ishte porosia e tij për popullin e Grenlandës.
“Mbështetje e plotë. Ne qëndrojmë me ju. Unë e dua vendin tuaj” – u përgjigj Macroni, raporton gazeta “The Guardian”.
Ai shtoi se “populli i Danimarkës dhe populli i Grenlandës janë njerëz të mrekullueshëm” dhe theksoi se ai “shkoi atje para disa muajve”, duke iu referuar qershorit të vitit të kaluar.
Në komente të tjera, Macroni tha të martën se Evropa nuk do të dorëzohet para bullizuesve e as nuk do të frikësohet.
Duke folur në Davos, ai tha se Franca dhe Evropa “nuk do ta pranojnë në mënyrë pasive ligjin e më të fortit”, duke shtuar se, nëse nuk veprohet kështu, situata do të vijë deri te “vasalizimi” i kontinentit, raporton agjencia e lajmeve “Reuters”.
Në vend të kësaj, sipas tij, Evropa do të vazhdojë që të qëndrojë në mbrojtje të sovranitetit territorial dhe sundimit të ligjit, pavarësisht lëvizjes drejt asaj që e quajti botë pa rregulla.
“Ne e parapëlqejmë respektin para bullizimit dhe e parapëlqejmë sundimin e ligjit para brutalitetit” – shtoi Macroni.
Ai e mbajti fjalimin pasi presidenti amerikan, Donald Trump, kërcënoi me taksa të larta ndaj verës dhe shampanjës franceze dhe i publikoi disa porosi private që i kishte marrë nga Macroni, shkelje e pazakonshme e diskrecionit diplomatik.
