Agjencia e Statistikave të Kosovës (ASK) ka publikuar Statistikat e Mirëqenies Sociale për muajin dhjetor 2025.
Sipas të dhënave, del se nga disa kategori të përfituesve të skemave pensionale, ka rritje, ndërsa te disa kategori tjera ka rënie, krahasuar me një vit më parë
Rritje është shënuar te skema për Pensionet Paraplegjike dhe Tetraplegjike me 12,6 %, skema e pensioneve të Forcës së Sigurisë së Kosovë me 8,6 %, ndërsa është rritur edhe numri i përfituesve të skemave për veteranët e luftës me 2,7 %, apo gati 1000 më shumë për një vit.
“Në muajin dhjetor 2025, krahasuar me muajin dhjetor 2024, kishte rritje të numrit të përfituesve nga: skema për Pensionet Paraplegjike dhe Tetraplegjike (12,6 %); skema e pensioneve të Forcës së Sigurisë së Kosovë (8,6 %); skema për përkrahje financiare familjeve që kanë fëmijë me aftësi të kufizuara (8,0 %); skema e pensioneve bazike të moshës (7,5 %); skema e kompensimit për punëtorët e arsimit që punuan gjatë vitit shkollor 1990/91 deri në vitin shkollor 1998/99 (5,1 %); skema e pensioneve për personat me aftësi të kufizuara (4,5 %); skema për veteranët e luftës (2,7 %). skema e pensioneve të Trupave Mbrojtëse të Kosovës (TMK) (0,8 %); skema e kompensimeve për personat e verbër (1,2 %)”, u tha në njoftimin e ASK-së.
Ndërkaq, kjo agjenci bëri me dije se te disa kategori përfituese të skemave sociale, ka pasur rënie të numrit të tyre.
“Në muajin dhjetor 2025, krahasuar me muajin dhjetor 2024, kishte rënie të numrit të përfituesve nga: skema për pensionet invalidore (-27,5 %); skema për pensionet e Trepçës (-20,6 %); skema për pensionet familjare (-10,6 %); skema e ndihmës sociale (-10,3 %); skema e pensioneve kontribut-paguesve të moshës (-2,0 %); skema për familjet e dëshmorëve dhe invalidët e luftës (-1,4 %)”, deklaroi ASK. /Klankosova.tv
