Autoriteti Evropian për Sigurinë e Ushqimit (EFSA) dhe Qendra Evropiane për Parandalimin dhe Kontrollin e Sëmundjeve (ECDC) kanë lëshuar një paralajmërim global për tërheqjen e disa produkteve ushqimore për foshnje, pas gjetjes së toksinës cereulide, të prodhuar nga bakteria Bacillus cereusra, shkruan Veriu.info.
Bëhet e ditur se kjo toksinë mund të shkaktojë të vjella, diarre dhe dhimbje barku, ndërsa tek foshnjat e mitura rrezikon çrregullimin e balancës së kripërave në trup dhe dehidratim.
Sipas EFSA dhe ECDC, tërheqjet kanë filluar që në dhjetor 2025 dhe vazhdojnë edhe në janar 2026 si masë parandaluese shëndetësore. Produktet e prekura shiten në Evropë dhe jashtë saj, dhe përfshijnë seritë e ndryshme të formulave ushqimore për foshnje. Ndërkohë, raportohen raste të diarreve tek foshnjat që kanë konsumuar produktet e tërhequra, por deri më tani nuk janë raportuar raste të rënda, raporton Veriu.info.
Në Kosovë, Agjencia e Ushqimit dhe Veterinarisë (AUV) njoftoi më 26 janar 2026 tërheqjen e produktit APTAMIL AR 2, paketimi ENG 24 x 400 gr, i prodhuar nga Nutricia Infant Nutrition Ireland Ltd. (Danone). Ky produkt përdoret për qëllime të veçanta mjekësore dhe gjatë kontrollit është konstatuar prania e toksinës cereulide. AUV bën thirrje që të gjithë konsumatorët që posedojnë këtë produkt të mos e përdorin dhe ta kthejnë në pikat e shitjes.
Autoritetet evropiane dhe ato kombëtare nënvizojnë rëndësinë e kërkimit të këshillave mjekësore tek foshnjat që shfaqin të vjella apo diarre pas konsumit të formulave të prekura, sidomos në rastet e simptomave të rënda si dehidratimi.
AUV garanton monitorimin e vazhdueshëm të tregut dhe zbatimin e masave parandaluese për të siguruar sigurinë ushqimore dhe mbrojtjen e shëndetit të konsumatorëve në Kosovë./Veriu.info
