Kryetari i Komunës së Mitrovicës, Faton Peci, ka deklaruar se bëhet fjalë për projektin më të madh investiv në Mitrovicë që nga paslufta. Sipas tij, “Impianti për Trajtimin e Ujërave të Zeza” ka një vlerë prej rreth 40 milionë euro.
Peci bëri të ditur se, së bashku me kryeshefin e Kompanisë Rajonale të Ujësjellësit “Mitrovica”, Bashkim Kurti, kanë vizituar nga afër lokacionin ku do të ndërtohet impianti. Ai theksoi se ky projekt do të ketë ndikim të drejtpërdrejtë në mbrojtjen e mjedisit, duke kontribuar në ruajtjen e florës dhe faunës, si dhe në krijimin e një Mitrovice më të gjelbër.
Sipas kryetarit Peci, ky investim pritet ta transformojë tërësisht qytetin e Mitrovicës në aspektin mjedisor.
