Avokati Armend Shkoza ka reaguar ashpër ndaj veprimeve të fundit të Prokurorisë lidhur me hetimet në procesin e numërimit të votave, duke i cilësuar ato si të përgjithësuara, selektive dhe të bazuara në funksion, e jo në përgjegjësi konkrete ligjore.
Në një reagim publik, Shkoza tha se ndalimi dhe intervistimi i kryesuesve të tavolinave të numërimit përbën një “diktat prokurorial”, pasi sipas tij, këta të fundit nuk kanë kompetenca ekzekutive, por vetëm rol organizativ.
Ai theksoi se formularët e rezultateve nënshkruhen nga të gjithë komisionerët e tavolinës së numërimit, fakt që, sipas tij, është i rregulluar qartë me Rregulloren 16/2024 të Komisionit Qendror të Zgjedhjeve (KQZ).
Shkoza e krahasoi këtë situatë me rastin “Stenta”, për të cilin tha se më vonë u dëshmua se hetimet kishin qenë të gabuara, ndërsa pasojat më të mëdha kishin qenë denigrimi i sistemit shëndetësor dhe i profesionistëve eminentë. Sipas tij, një skenar i ngjashëm po përsëritet tani në sektorin zgjedhor.
“Me këto veprime nuk po zbardhet e vërteta, por po denigrohet i gjithë sistemi zgjedhor,” u shpreh Shkoza, duke shtuar se pretendimi se rreth 90 përqind e tavolinave të numërimit janë të përfshira në falsifikim, përbën tregues të dështimit të një sistemi të tërë dhe cenon rëndë besimin publik.
Ai vuri theksin edhe te roli i KQZ-së si institucion kushtetues përgjegjës për organizimin e zgjedhjeve, duke ngritur pyetjen se si mund të inkurajohen qytetarët të angazhohen në procesin zgjedhor kur përballen me ndalime masive dhe hetime gjithëpërfshirëse.
Në fund, Shkoza kritikoi edhe mënyrën e raportimit medial, veçanërisht përdorimin e termit “zbarkuan”, duke shtuar se nëse duhet të ketë hetime të thelluara, ato duhet të nisin nga zyrat e KQZ-së dhe zinxhiri institucional më lart.
