Përfshirja e ish-emisarit për dialogun Kosovë-Serbi, Miroslav Lajçak, në dosjen Epstein nuk e komprometon procesin e normalizimit të marrëdhënieve mes Kosovës dhe Serbisë, të cilin ai e ka ndërmjetësuar për pesë vjet. Kështu vlerësojnë zyrtarët evropianë, duke insistuar se lidhjet e Lajçakut nuk kanë pasur ndikim në dialog.
Publikimi i mesazheve mes ish-emisarit për dialogun Kosovë-Serbi, Miroslav Lajçak dhe abuzuesit seksual, Jeffrey Epstein, nuk e dëmtoi këtë proces të ndërmjetësuar nga ai, sipas Bashkimit Europian.
Zëdhënësja e BE-së, Anitta Hipper, tha se dialogu mbikëqyret vazhdimisht nga shtetet anëtare.
“Kur bëhet fjalë për dialogun si të tillë, ai mbetet i paprekur nga zhvillime të tilla. Dialogu është një proces i qëndrueshëm që nga viti 2011, i cili është në pronësi të palëve dhe udhëhiqet nga Përfaqësuesi i Lartë. Gjithashtu, dialogu mbikëqyret vazhdimisht nga shtetet anëtare”, tha ajo.
Në konferencën e sotme për media, zëdhënësit e BE-së u pyetën nëse emisari sllovak ka pasë ndonjë “ndikim nga jashtë” pasi Lajçak në këto biseda të vitit 2018 fliste për një takim të mundshëm me kryediplomatin rus, Sergei Lavrov, për të cilin thoshte se e kishte “model profesional”.
Por, në deklarimin e tij të parë mbi këtë çështje pasi dha dorëheqje prej postit të këshilltarit të kryeministrit sllovak, Robert Fico, Lajçak tha se pasi nisi lufta në Ukrainë, ka ndërruar mendim.
“E ndryshova pikëpamjen time për Lavrovin pasi ai u bë fytyra dhe zëri i agresorit në Ukrainë”, tha sot Lajçak për një radio sllovake.
