Drejtori i Përgjithshëm i Policisë së Kosovës, Gazmend Hoxha, ka folur sot për përhapjen e fenomenit të fajdes në vend.
Sipas Hoxhës, njëra nga format e fajdes, është edhe ajo e pronarëve të salloneve të veturave.
“Fenomeni është prezent dhe kemi krijuar një task-forcë. Janë dy ose tri forma si po kryhen fajdet në Kosovë. E para është kur fajdexhiu, së bashku me viktimën, shkojnë te noteri dhe noterizojnë marrëveshjet për fajde. E dyta lidhet me sallonet e veturave dhe shitblerjen e tyre. Sipas informacioneve që kemi, pronarët e salloneve të veturave janë të përfshirë në fajde,” ka deklaruar Hoxha.
Tash tri vite, më saktësisht me 2 mars 2023, Prokuroria Themelore në Ferizaj, në koordinim me Drejtorinë për Hetimin e Krimeve të Rënda kishte realizuar një aksion kundër fajdes, ku kishte arrestuar 15 persona dhe kishte realizuar disa bastisje në auto sallone.
Në mesin e auto salloneve të bastisura ishte edhe auto sallon “Iliri” me pronar vushtrriasin Ilir Vërshevcin, përderisa në publik si pronar prezantohej Sheqir Vëshevci.
Ky i fundit në një deklarim për media kishte thënë: “Kurgja nuk ka ndodh aty, ju kisha lut mos u merrni më këtë punë. Ani krejt në rregullu Policia u kanë aty, Dogana ke me i këqyr do kerre a kanë doganë a jo, dhe ju kisha lut mos u merrni me këtë punë”, ka thënë Vërsheci.
Gjatë aksionit të 2 marsit 2023 prokuroria kishte sekuestruar gjëra që i konsideronte si dëshmi, ku: Fitim Vërshevcit i ishin sekuestruar: a) Një DWR, b) 16 USB, c) Një shufër metalike dhe Ilir Vershevcit i ishte sekuestruar: Pasaporta.
Ndryshe, para pesë (5) ditësh Veriu.info ka dërguar pyetje në Prokurorinë Themelore të Ferizajt, për të mësuar se a janë ngritur aktakuzat për arrestimin e 15 personave të arrestuar në operacionin kundër fajdes më 2023, por deri më tash nuk kemi marrë përgjigje.
