Analisti politik Astrit Gashi ka komentuar mundësinë e rizgjedhjes së Vjosa Osmanit presidente të Kosovës, duke përmendur edhe skenarë të mundshëm të marrëveshjeve politike mes partive kryesore në vend.
Gjatë Debat Plusit, Gashi fillimisht ka bërë një koment ironik lidhur me përkrahjen që, sipas tij, gëzon aktualisht Osmani.
“Momentalisht Vjosa Osmani në realitet i ka nja dy-tre përkrahës ose vota. Një është Tayna, dy është Valdrin Sahiti, dhe treta nëse nuk iu ka idhnu për Taynën është Dafina Zeqiri. Kërkon tjetër se s’ka. Momentin këto tri vota i ka në tavolinë Vjosa Osmani, që mundet t’i pres. Tash kthemi seriozisht”, ka thënë Gashi.
Ai ka pohuar se në qarqe politike po qarkullojnë informata për një marrëveshje të mundshme trepalëshe mes Vjosa Osmanit, kryeministrit në detyrë Albin Kurti dhe kryetarit të LDK-së, Lumir Abdixhiku.
“Ka një marrëveshje trepalëshe Osmani, Kurti, Abdixhiku. Që do ta nënkuptonte një qeverisje të përbashkët me dy-tri ministri për LDK-në. Me një zgjedhje të Vjosa Osmani presidente… prapë po them nuk janë të konfirmuara, janë gjëra që kanë rrjedh si informata”, ka shtuar Gashi.
