Arian Tahiri, deputeti i zgjedhur nga radhët e Partisë Demokratike të Kosovës, ka qenë i ftuari i radhës në emisionin “Blic Interview” me Astrit Gashin.
Tahiri ka deklaruar se rezultati zgjedhor nuk i ka përmbushur pritjet e PDK-së, megjithatë ai e cilëson atë si një realitet demokratik që duhet respektuar.
Ai theksoi se, pavarësisht angazhimit të madh dhe punës së bërë për rritjen e numrit të deputetëve dhe votës për PDK-në, opozita në tërësi ka pritur një mbështetje më të madhe nga qytetarët.
“Ka qenë në përgjithësi një rezultat që si Parti Demokratike e Kosovës, po besoj shumë se e gjithë pjesa opozitare ka pritë me pas një mbështetje më të madhe, është një rezultat që nuk është i kënaqshëm në kuptimin partiak sepse është punu dhe ka pas angazhim të gjithëvë në mënyrë që PDK ta rritë numrin e deputëve, ta rritë votën. Pavarësisht kësaj ky është një realitet demokratik tashmë të cilin ne duhet me respektu dhe menjëherë me fillu angazhimine aktivitetin tonë, edhe në degët në strukturat tona, bashkërisht me lidershipin dhe me të gjithë në kuptim të konsilidimit, organizimit, riorganizimit dhe PDK të vazhdojë ta luaj rolin e saj si forca kryesore opozitare që realisht edhe jem, cdo herë në interes edhe të shtetit edhe të Kosovës por edhe të qytetarëve me qëllim që të ketë një përfaqësim të dinjitetshëm”, vlerësoi ai.
Duke folur për rezultatin e brendshëm, ai e cilësoi atë si mesazh dhe shprehje të qartë të vullnetit të elektoratit të PDK-së për përfaqësim dinjitoz.
“Sa i përket rezultatit në pjesën e brendshme, mendoj se është një mesazh dhe një vullnet i elektoratit të PDK-së që me e dhënë mbështetjen për të gjithë që me pas një përfaqësim sa më të dinjitetshëm”, tha Tahiri.
Tahiri ka shprehur mirënjohje të veçantë për votuesit që i kanë dhënë mbështetje personale, duke e cilësuar këtë si nder, por edhe si përgjegjësi të madhe.
Në fund, deputeti i zgjedhur theksoi se PDK do të vazhdojë të punojë për rritjen e partisë, duke ftuar të rinj, vajza e djem, si dhe familje të ndershme që t’i bashkohen PDK-së dhe ta shohin atë si mundësi për kontribut në shërbim të Kosovës dhe qytetarëve të saj.
“Unë i jam shumë mirënjohës secilit votues të PDK-së, për mbështetjen e madhe dhe personale që ma kanë dhënë mu, për mua është nder i madh por përtej saj është përgjegjësi e madhe që besimin e tyre me kthy me përfaqësim të dinjitetshëm e angazhim të përditshëm në mënyrë që ata të ndihen krenarë për mbështetjen, besimin, votën që ma kanë dhënë mu por edhe PDK. Bashkarisht me gjithë deputetët dhe deputetet ti përfaqësojmë dinjitetshëm, ta përfaqësojmë ta mbrojmë intersin e vendit tonë dhe të punojmë fortë cdo ditë që ta rrisim Partinë Demokratike të Kosovës, duke afru djem e vajza, familje të mira e të ndershme që ti bashkohen PDK dhe përmes PDK ta shohin si mundësi kontributin, energjinë dhe potencialin e tyre në shërbim të vendit, në shërbim të shtetit tonë, që është misioni jonë kryesor, angazhimin që me bë më të mirën për qytetarët tonë dhe për shtetin tonë Kosovën”, përfundoi ai për GazetaBlic.
