Gazetarja me përvojë kritikon mediat dhe institucionet për trajtimin e ngjarjeve private të figurave publike, duke paralajmëruar për rrezikun e humbjes së privatësisë.
Gazetarja me përvojë shumëvjeçare në media, Mimoza Koprani, ka reaguar ashpër ndaj mënyrës se si trajtohen ngjarjet private në media dhe rrjete sociale, duke paralajmëruar për një situatë që, sipas saj, po del jashtë kontrollit, shkruan Gazeta Infokus.
banner
Në një intervistë në “Podcast me Shkelzen Dakaj”, ajo theksoi se çdo ngjarje që i ndodh një figure publike, qoftë tragjedi apo konflikt familjar, shndërrohet menjëherë në “spektakël” për opinionin.
Sipas Kopranit, publiku bombardohet vazhdimisht me të njëjtat lajme sensacionale, sidomos në rrjetet sociale, ku përmbajtjet për jetën private të këngëtarëve, sportistëve apo personazheve të tjera të njohura përsëriten dhjetëra herë.
“Nëse një figure të njohur i ndodh diçka në familje, qoftë tragjedi apo zënkë, menjëherë bëhet shumë interesante për opinionin. Sapo hyn në Facebook ose në rrjete të tjera sociale, e sheh qindra herë të njëjtin lajm. Kur kombinohen përmbajtjet rozë me kronikën e zezë, atëherë shpërthen ekstremi”, ka deklaruar ajo.
Megjithatë, sipas saj, problemi nuk qëndron vetëm te mediat, por edhe te mënyra se si institucionet trajtojnë informacionet dhe privatësinë e qytetarëve.
“Jemi në një moment shumë të rrezikshëm për privatësinë. Jo vetëm mediat po e shkelin atë, por edhe autoritetet e rendit. Unë shqetësohem shumë, sepse sot do të kisha frikë të shkoja në polici për të denoncuar një rast”, është shprehur Koprani.
Ajo apeloi për më shumë etikë profesionale dhe përgjegjësi, duke theksuar se mbrojtja e privatësisë duhet të jetë prioritet si për mediat, ashtu edhe për institucionet.
