Dhomat e Specializuara në Hagë kanë njoftuar sot (10 shkurt 2026) se ish-kreu i AKI-së, Bashkim Smakaj, dhe ish-pjesëtari i UÇK-së, Fadil Fazliu, janë liruar me kusht për t’u kthyer në Kosovë.
Vendimi është marrë nga Gjykatësi i Vetëm pas rishikimit të paraburgimit, ku u konstatua se mbajtja e tyre e mëtejshme në izolim nuk ishte më e arsyeshme dhe as proporcionale.
Sipas komunikatës zyrtare, gjykatësi ka vlerësuar se e drejta për liri peshon më shumë se rreziqet e mundshme të pengimit të procesit. Një faktor kyç ishte se koha që Smakaj dhe Fazliu kanë kaluar deri tani në paraburgim, tejkalon dënimin minimal që ata do të merrnin sipas ligjit nëse do të shpalleshin fajtorë.
“Gjykatësi mori parasysh gjithashtu se faza e paraqitjes së provave në çështjen e krerëve të UÇK-së tashmë ka përfunduar dhe se nuk ka gjasa që ndonjë veprim i mundshëm pengimi të mos zbulohet”, thuhet në komunikatë.
Gjykata ka konstatuar se nuk ka rrezik për arratisje, sidomos për shkak të shumës së dorëzanisë financiare (garancisë) të ofruar prej tyre, të cilën do ta humbisnin nëse tentojnë të largohen.
Ndonëse janë liruar, Smakaj dhe Fazliu mbeten të akuzuar në “Çështjen gjyqësore 12” dhe duhet t’u përmbahen një sërë kushtesh të caktuara nga gjykata.
Lirimi i tyre vjen në një moment kritik, pasi vetëm dje Prokuroria kërkoi dënime kapitale për krerët e tjerë të Shtabit të Përgjithshëm të UÇK-së.
