Presidentja e vendit, Vjosa Osmani, ka njoftuar se ka pritur në Kosovë delegacionin e lartë dërguar nga presidenti i Emirateve, pas një takimi që kishte me të javën e kaluar në Abu Dhabi, njofton Gazeta Online Veriu.info.
Ajo ka shpalosur vizatat e sotme filluar nga spitali i fëmijëve në QKUK ndërtuar nga Emiratet, për të vazhduar në vendin ku do të ndërtohet spitali i ri i Gjinekologjisë.
Pastaj vizitën e kanë vazhduar në Mitrovicë ku diskutuan idenë e një projekti transformues për qytetin.
Njoftimi i presidentes:
Pas takimit të shkëlqyeshëm me Presidentin e Emirateve, Sheikh Mohamed bin Zayed Al Nahyan, javën e kaluar në Abu Dhabi, sot patëm nderin të mirëpresim në Kosovë delegacionin e lartë të dërguar personalisht prej tij – me një mision të qartë: mbështetjen e vazhdueshme për sektorin e shëndetësisë, si dhe thellimin e marrëdhënieve tona dypalëshe përmes projekteve që ndikojnë drejtpërdrejt në jetën dhe mirëqenien e qytetarëve tanë.
Së bashku me delegacionin e Emirateve dhe Ministrin Vitia u mirëpritëm nga stafi e menaxhmenti i QKUK, prindër e fëmijë në spitalin e fëmijëve Sheikha Fatima, të ndërtuar nga Emiratet, si dhe vizituam lokacionin ku do të ndërtohet spitali i ri i gjinekologjisë në Prishtinë, i cili bazuar në dakordimin tonë paraprak do të bëhet me mbështetje të Emirateve.
Mëpastaj vizituam Mitrovicën ku u pritëm nga Kryetari Faton Peci dhe diskutuam edhe idenë e një projekti të ri transformues në të mirë të të gjithë qytetarëve tanë.
Mirënjohje e thellë për Lartësinë e tij, Presidentin Mohamed bin Zayed Al Nahyan, si dhe për Lartësinë e saj, Sheikha Fatima Bint Mubarak, për mbështetjen, besimin dhe miqësinë e sinqertë ndaj Kosovës.
🇽🇰 🇦🇪
