Mbi 200 mijë qytetarë pritet t’i bashkohen marshit “Drejtësi, jo politikë” që do të mbahet më 17 shkurt në Prishtinë.
Kështu ka thënë përfaqësuesja e platformës “Liria ka emër”, Eliza Hoxha.
Ajo ka shtuar se ky do të jetë marshi më i madh në historinë e Kosovës së lirë.
“Kjo nuk është çështje partie, pushteti, por është çështje drejtësie dhe dinjiteti kombëtar. Kemi marrë konfirmime nga shqiptarë nga i gjithë rajoni dhe Evropa. Diaspora jonë po organizohet, po vjen, po udhëton me orë të tëra për të qenë bashkë. Po na vijnë fotografi e mesazhe me familje të cilat na tregojnë që do të jenë prezente aty bashkë. Ky është momenti kur e kupton që ky marsh nuk i përket vetëm një platforme dhe individi, thjesht ky marsh i përket popullit të Kosovës. Presim mbi 200 mijë qytetarë në këtë marsh. Do të jetë marshi më i madh në historinë e Kosovës së lirë. Por madhështia e tij nuk matet vetëm me numra, por do të matet me qetësinë tonë, me disiplinën dhe dinjitetin tonë dhe seriozitetin e mesazhit që do të përcjellim atë ditë” – ka thënë ajo.
