Në seancën solemne për shënimin e 18-vjetorit të pavarësisë së Kosovës, Vjosa Osmani ka thënë se UÇK-ja është është ideali më i madh që kanë ndërtuar shqiptarët ndër shekuj dhe se ajo është zemra e rezistencës sonë kombëtare dhe përgjigjja e një populli të shtypur ndaj një regjimi gjenocidal, duke shtuar se kjo luftë ishte gjithnjë e drejtë, e pastër dhe gjithnjë e domosdoshme, raporton Ekonomia Online.“Sot, me respektin më të thellë, përulemi para kujtimit të gjithë atyre burrave e grave që ranë për këtë ditë, në mënyrë që Kosova të jetë republikë.
Në themelet e shtetit tonë qëndron vizioni i presidentit historik, doktor Ibrahim Rugova, arkitektit të pavarësisë së Republikës sonë. Me mençuri, durim, vizion dhe një besim të palëkundur në lirinë dhe dinjitetin e popullit tonë, ai udhëhoqi Kosovën në kohët më të rënda, duke i dhënë kauzës sonë legjitimitet e mbështetje ndërkombëtare, si dhe shpresë të brendshme. Historia jonë më tej është brumosur në periudhën e luftës për liri; ajo mban emrin e komandantit legjendar Adem Jashari, familjes së tij heroike dhe të të gjithë burrave dhe grave të UÇK-së. UÇK-ja është ideali më i madh që kanë ndërtuar shqiptarët ndër shekuj. Ajo është zemra e rezistencës sonë kombëtare dhe përgjigjja e një populli të shtypur ndaj një regjimi gjenocidal. Kjo luftë ishte gjithnjë e drejtë, e pastër dhe gjithnjë e domosdoshme”, tha Osmani.Osmani tha se është e papranueshme çdo përpjekje për të barazuar viktimën me agresorin.
Ajo bëri thirrje që të jenë të gjithë së bashku në mbrojtje të luftës çlirimtare.“Çdo përpjekje për ta njollosur atë, për ta relativizuar apo për të barazuar viktimën me agresorin është jo vetëm e padrejtë, por edhe historikisht e pavërtetë dhe tërësisht e papranueshme. Krerët e UÇK-së që gjenden në Hagë, së bashku me mijëra luftëtarë të tjerë dhe me mbështetjen e palëkundur të popullit të Kosovës, u ngritën për liri, dinjitet dhe për të drejtën e patjetërsueshme për të jetuar të lirë në atdheun e tyre.
Prandaj, çdo përpjekje për të barazuar luftën tonë çlirimtare me krimet e regjimit gjenocidal të Serbisë jo vetëm që minon drejtësinë, por dëmton edhe themelet e paqes afatgjatë në rajonin tonë.
Lufta e UÇK-së ishte shtylla jonë më e fuqishme e rezistencës dhe shpresës; kjo e vërtetë historike është themel i shtetit tonë dhe nuk mund të zhbëhet nga asnjë përpjekje për rishkrim apo deformim të historisë. Sot, më shumë se kurrë, e kemi për detyrë të qëndrojmë së bashku.
Asnjë dallim i yni, i së kaluarës apo i së tashmes, nuk guxon të jetë pengesë në unitetin tonë, në mbrojtjen e luftës sonë çlirimtare, sepse kështu ne e mbrojmë pastërtinë e lirisë, pavarësisë dhe vetë ekzistencën e shtetit tonë”, theksoi Osmani.
