Një ditë pas fjalës përfundimtare të ish-krerëve të Ushtrisë Çlirimtare të Kosovës (UÇK) para Dhomave të Specializuara në Hagë, reagoi Partia Demokratike e Kosovës (PDK), e cila beson në pafajësinë dhe lirinë e çlirimtarëve, derisa pret vendim të drejtë dhe të pandikuar.
Në këtë subjekt thonë se e kanë përcjellë me vëmendje paraqitjen e katër ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi në deklarimin e tyre.
“Pas më shumë se pesë vjetësh në paraburgim, paraqitja e tyre ishte dinjitoze dhe e mbështetur në të vërtetën e luftës së popullit të Kosovës për liri. Ata folën me përgjegjësi, me respekt për procesin dhe me besim në drejtësi, duke dëshmuar se përballja me drejtësinë nuk është shmangie nga historia, por pjesë e saj”, thuhet në reagimin e PDK-së.
Në këtë fazë vendimtare, PDK-ja shpreh pritjen dhe kërkesën që vendimi të jetë i drejtë, i paanshëm dhe i bazuar ekskluzivisht në fakte dhe prova, larg çdo narrative apo perceptimi politik.
“Lufta e popullit të Kosovës për liri ishte një luftë e drejtë, çlirimtare dhe e domosdoshme për mbijetesë përballë një regjimi shtypës. Kjo është një e vërtetë historike, e njohur nga qytetarët tanë dhe e konfirmuar nga rrjedha e zhvillimeve ndërkombëtare që çuan në ndërhyrjen e NATO-s dhe shpalljen e pavarësisë së Kosovës”, thekson PDK-ja.
Partia rithekson besimin në pafajësinë e Hashim Thaçit, Kadri Veselit, Jakup Krasniqit dhe Rexhep Selimit dhe pret që, pa zvarritje dhe mbi bazën e fakteve dhe provave, të merret një vendim i drejtë dhe i paanshëm, që do të konfirmojë lirimin e plotë nga të gjitha pikat e aktakuzës.
“PDK rithekson solidaritetin me familjet e ish-krerëve të UÇK-së, falënderon qytetarët për mbështetjen e madhe përmes marshimeve dhe protestave, si dhe shpreh mirënjohje për profesionalizmin dhe hapësirën e ofruar nga mediat gjatë gjithë kësaj periudhe”, thuhet në reagim.
Në fjalët e tyre përfundimtare, katër ish-krerët e UÇK-së deklaruan njëzëri pafajësinë, duke theksuar se përgjegjës për çdo dhunë dhe masakër në Kosovë ishte regjimi i Sllobodan Millosheviqit dhe politikat e tij gjenocidale, jo UÇK-ja.
Ata ritheksojnë se drejtësia është e domosdoshme, edhe nëse vjen me vonesë, dhe se provat tregojnë qartë pafajësinë e tyre. Secili ka kërkuar nga gjykata të marrë një vendim të drejtë, duke njohur rolin e UÇK-së si forcë çlirimtare dhe duke konfirmuar se lufta e tyre ka qenë një luftë për dinjitet, liri dhe mbrojtjen e popullit të Kosovës.
