Korporata Energjetike e Kosovës (KEK) i ka dhënë sërish një tender të negociuar kompanisë “Ex Fis”, procedurë kjo që kufizon konkurrencën. Vlera e kontratës është 260 mijë euro. Kompania e derivateve “Ex Fis”, që u rekomandua për tenderin e KEK, njihet në publik edhe si financuese e Lëvizjes Vetëvendosje, sa kjo e fundit ishte në opozitë.
Kontrata që KEK i ka dhënë kompanisë “EX-Fis” është e negociuar pa publikimit të njoftimit për kontratë.
“EX-Fis” do bëjë furnizimin me mazut për KEK.
Sipas njoftimit për dhënie të kontratës (16.02.2026), vlera e tenderit është 260 mijë euro.
“Kontraktuesi me rastin e importimit te lendes djegëse- Fuel Oil 1.0% për KEK-un sha merr për sipër te paguaj te gjitha obligimet e shpenzimeve te blerjes se Fuel Oil 1.0% dhe oligimet ne baze te DUD-it ndërsa KEK sha do i paguaj j këto shpenzime duke u bazuar ne dëshmitë Inkotermin CIF që kuotohet sipas Platts European Marketscan (Çmimi i Platts-it) , mesatarja ditore e kurseve të këmbimit mes Euro dhe Dollarit, shpenzimet e kontraktorit ,transportin si dhe TVSH-në”, thuhet në dosje.
Ndërkaq, në dosjen e tenderit thuhet se një pjesë e furnizimit duhet të bëhet brenda dy ditësh pas nënshkrimit te kontratës.
“Afati i furnizimit: suksesivisht në kohëzgjatje prej max. 20 ditë pas nënshkrimit të kontratës. Plani dinamik i liferimit: sasia prej 75 ton duhet të filloj jo më larg se dy (2) ditë pasi të nënshkruhet kontrata,,sasia tjeter do të liferohet suksesivisht, ndërsa komplet kontrata duhet të realizohet për 20 ditë kalenadarik prej datës së nënshkrimit“, thuhet aty.
Periudha e vlefshmërisë se tenderit do të jetë: 90 ditë
Kjo nuk është hera e parë që “Ex Fis” përfiton kontratë nga KEK-u.
Para dy muajsh, e njëjta kompani kishte fituar një tjetër tender njëburimor për furnizim me mazut.
Ndërsa në korrik 2025, KEK-u e kishte shpërblyer kompaninë me 592,562.06 euro për furnizim me Fuel Oil 1.0%.
Çka thotë ligji për kontratat me negocim?
Ndërmarrja Publike Korporata Energjetike e Kosovës [KEK], ka kufizuar konkurrencën në këtë kontratë, duke mos u dhënë mundësi operatorëve të tjerë ekonomikë të paraqesin ofertat e tyre përmes procedurës së hapur.
Sipas Ligjit për Prokurimin Publik, kontratat njëburimore apo procedurat e negociuara lejohen vetëm në raste të veçanta, kur plotësohen kushte të caktuara ligjore.
Ndër këto kushte, sipas nenit 35 të ligjit, përfshihen rastet emergjente kur nuk ka kohë për ndjekjen e procedurave të zakonshme, ose kur ekzistojnë arsye të veçanta teknike apo artistike që justifikojnë përzgjedhjen e një operatori të caktuar ekonomik.
Ligji specifikon se procedura e negociuar mund të përdoret vetëm në këto raste:
-Nëse, për arsye objektive dhe të detyrueshme teknike ose artistike, kontrata duhet t’i jepet një operatori të caktuar ekonomik;
-Nëse, për arsye të mbrojtjes së të drejtave të pronës intelektuale apo industriale, ose të drejtave ekskluzive, kontrata mund t’i jepet vetëm një operatori të caktuar ekonomik;
-Nëse, për arsye të emergjencave ekstreme, të shkaktuara nga ngjarje objektivisht të verifikueshme dhe të paparashikueshme nga autoriteti kontraktues, nuk mund të respektohen afatet kohore të procedurave të tjera të parashikuara me ligj.
Kompania që u shpërblye me kontratë, donator i Vetëvendosjes
Kompania e derivateve Ex Fis, që u rekomandua për tenderin e KEK, njihet në publik edhe si financuese e Lëvizjes Vetëvendosje, sa kjo e fundit ishte në opozitë.
“EX FIS”, figuronte me vlerën më të madhe të mallrave si donacion, duke ia dhuruar tashmë partisë në pushtet plot 9,534 euro përgjatë zgjedhjeve të vitit 2020.
Po ashtu, të dhënat e shpenzimeve të LVV-së për periudhën 2020-2023 dhe 2024, tregojnë se partia është furnizuar nga kjo kompani për derivatet e automjeteve të saj.
