Dy të akuzuarit për sulmin në Banjskë, Blagoje Spasojeviq dhe Vladimir Toliq, kanë vendosur që në këtë proces gjyqësor të mbrohen në heshtje, ndërsa i akuzuari Dushan Maksimoviq ka vendosur që ta japë fjalën e mbrojtjes.
Vendimet e tyre u bënë të ditura gjatë shqyrtimit gjyqësor, ku mbrojtja paraqiti qëndrimet lidhur me deklarimin e të akuzuarve në këtë fazë të procedurës.
Sipas deklarimeve në seancë, dy të akuzuarit kanë zgjedhur të shfrytëzojnë të drejtën ligjore për të mos dhënë mbrojtje në këtë fazë, ndërsa për të akuzuarin e tretë u kërkua shtyrje e dhënies së mbrojtjes për shkak të nevojës për shqyrtim të materialeve të lëndës.
Avokati i Blagoje Spasojeviqit, Ljubomir Pantoviq, tha se klienti i tij do të mbrohet në heshtje dhe nuk do të deklarohet në këtë shqyrtim.
“Ai do të mbrohet në heshtje, kështu që nuk do të deklarohet në këtë shqyrtim”, tha ai.
Edhe vetë Spasojeviq deklaroi para gjykatës se, ashtu siç ka thënë avokati i tij, do ta shfrytëzojë të drejtën për t’u mbrojtur në heshtje.
“E nderuar gjykatë, siç ka thënë avokati, do ta shfrytëzoj të drejtën time dhe do të mbrohem në heshtje”.
Avokati Millosh Deleviq deklaroi se edhe i mbrojturi i tij, Vladimir Toliq, do t’i shfrytëzojë të drejtat ligjore për të mos dhënë mbrojtje pas këshillimit me mbrojtësin e tij.
“Edhe i mbrojturi im Vladimir Toliq do t’i shfrytëzojë të drejtat ligjore të mos japë mbrojtjen pas këshillit me mua si mbrojtës i tij”.
Po ashtu, Toliq konfirmoi se pajtohet me avokatin e tij dhe do ta shfrytëzojë të drejtën ligjore për t’u mbrojtur në heshtje.
“Unë pajtohem me avokatin tim dhe do ta shfrytëzoj të drejtën ligjore që të mbrohem në heshtje”, tha ai.
Avokatja Jovana Fillipoviq deklaroi se Dushan Maksimoviq do ta japë mbrojtjen para gjykatës, por jo në seancën e sotme, pasi sipas saj ai nuk ka pasur mundësi të njoftohej me shkresat e lëndës.
Ajo propozoi që mbrojtja të ketë mundësi të shqyrtojë materialin në qendrën e paraburgimit dhe Maksimoviq në seancën e ardhshme ta japë mbrojtjen dhe të deklarohet.
“Dushan Maksimoviq do ta japë mbrojtjen e tij para gjykatës, mirëpo ne për sot nuk mund ta bëjmë sepse Dushani nuk ka mundur të njoftohej me shkresat e lëndës, prandaj propozoj që të kemi mundësi ta shohim materialin në qendrën e paraburgimit dhe Dushani në seancën tjetër ta japë mbrojtjen e tij dhe të deklarohet”.
Ndërkaq, i akuzuari Maksimoviq deklaroi se e konsideron të domosdoshme të njoftohet me video-incizimet dhe proceset e dorëzuara, në mënyrë që të mund të deklarohet në një seancë tjetër.
“Mendoj se është e domosdoshme që unë të njoftohem me video-incizimet dhe proceset e dorëzuara, ashtu që të deklarohem në një seancë tjetër”, deklaroi i akuzuari Maksimoviq.
Pas konsultimit, kryetari i trupit gjykues, Ngadhnjim Arrni, deklaroi se aprovohet propozimi i avokates Jovana Fillipoviq që seanca e sotme të ndërpritet dhe mbrojtja e të akuzuarit Dushan të jepet në një datë tjetër, pasi sipas tij mbrojtja ka nevojë për konsultime më të zgjeruara me të akuzuarin në mënyrë që ai ta japë mbrojtjen e tij.
“Aprovohet propozimi i avokates Jovana Fillipoviq që seanca e sotme të ndërpritet dhe se mbrojtja e të akuzuarit Dushan të jepet në një datë tjetër, pasi që paraprakisht mbrojtja ka nevojë që të ketë konsultime më të zgjeruara me të akuzuarin, në mënyrë që të japë mbrojtjen e tij”, tha ai.
