Kryeministri i Kosovës, Albin Kurti gjatë fushatës për zgjedhjet e 28 dhjetorit, kishte premtuar ndërtimin e xhamisë te Ura e Ibrit, ashtu siç ekzistonte para se të digjej nga forcat serbe.
Mirëpo premtimin e bërë në fushatë, nuk e miratoi edhe me buxhet kur sot u votua projekt-buxheti për vitin 2026.
Deputeti Eman Rrahmani bëri përpjekje që projekti i ndërtimit të xhamisë të përfshihej me amendament, mirëpo këtë e rrëzuan shumica e prirë nga Vetëvendosje e Albin Kurtit.
“Amendamenti ka të bëjë me propozimin për ndërtimin e xhamisë, paraqet edhe vullnetin politik të kryeministrit, i cili gjatë fushatës e ka premtu që kjo xhami do të ndërtohet”, ka thënë Rrahmani gjatë prezantimit në Kuvend.
Kuvendi i Kosovës e ka miratuar Projektligjin për ndarjet buxhetore për vitin 2026.
Buxhetin e kanë votuar deputetët e pushtetit ndërkohë që ata të opozitës kanë votuar kundër.
Për kanë votuar 62 deputetë, kundër 36 dhe asnjë nuk ka abstenuar.
Buxheti për vitin 2026 është paraparë të jetë 4 miliardë euro, prej të cilave 3.64 miliardë janë të hyra, ndërsa pjesa tjetër do të mbulohet me kredi dhe me deficit.
Ministri i Financave Hekuran Murati, ka thënë se buxheti për vitin 2026 është i përkohshëm dhe emergjent dhe se ai do të rishikohet e ndryshohet me prioritete e Qeverisë të reflektuara në të.
Ndërkohë që përfaqësuesit e opozitës kanë votuar kundër pasi që amendamentet e tyre nuk janë përfshirë në buxhet.
