Aleksandër Ivanoviç, nipi i Oliver Ivanoviç-it, ka thënë për mediumin serb “Nova” se Serbia i ka ndaluar hetimet në lidhje me vrasjen e mistershme të politikanit serb nga Kosova dhe se e vetmja që po vazhdon hetimet është Prokuroria Speciale në Prishtinë.
“Sipas informacioneve tona, Beogradi nuk po kryen më hetime. Ata ishin vetëm në fazën e para-hetimit. E vetmja që po kryhen hetim është Prokuroria Speciale në Prishtinë.” thotë ai, transmeton “Nova”.
Ai ka mbështetur kërkesën e grupit parlamentar të Partisë Social-Demokrate të Serbisë, e cila ka kërkuar formimin e komisionit hetimor në Kuvendin e Serbisë, për të përcaktuar rrethanat në lidhje me vrasjen e Ivanoviç-it.
“Është gjë e mirë dhe e mbështes hapjen e kësaj çështjeje në media dhe para të gjitha institucioneve shtetërore. Se a do të ketë epilog dhe si do të pozicionohet partia në pushtet në raport me të, kjo është një pyetje tjetër dhe përgjigjen do ta marrim shumë shpejt”.
Kyretari i Komisionit Ekzekutiv nga radhët e Partisë Demokrate, Serdan Milivojeviç, tha për “Nova” se vrasja e Ivanoviç-it duhet t’i kthehet jetës politike si temë, sepse sipas tij dalëngadalë po harrohet.
Ivanoviç u vra më 16 janar 2018, me gjashtë të shtëna në shpinë, përpara zyrës se partisë së tij në Mitrovicën e Veriut.
Në kohën e ngjarjes, Ivanoviç ishte në proces gjyqësor, për pretendime mbi vrasjen e shqiptarëve të Kosovës gjatë luftës çlirimtare të vitit 1999. Deri në vitin 2008, ai ishte kreu i serbëve të Kosovës.
Pas firmosjes së marrëveshjes së Brukselit, Serbia dhe Kosova filluan normalizimin e raporteve. Nga kjo kohë qasja e Ivanoviç në politikë ishte moderuar. Në vitin 2014 ai u akuzua për krime lufte dhe u burgos.
Në 2016-ën, u dënua me nëntë muaj burgim nga misioni i Bashkimit Evropian në Kosovë – EULEX. Ndërkohë në vitin 2017, Gjykata e Prishtinës e anuloi këtë vendim duke e liruar politikanin serb dhe duke rinisur një proces të ri.
Gjatë kësaj kohe, Ivanoviç mori kërcënime të shumta, deri në çastin e vrasjes së tij, në janar të 2018-ës
Procedura në Prishtinë po zhvillohet kundër gjashtë personave të dyshuar si të përfshirë në këtë vrasje – Nedeljko Spasojeviç, Dragisha Markoviç, Rade Basara dhe Zharko Jokanoviç, të cilët ishin pjesëtarë të Policisë së Kosovës në kohën e vrasjes.
