Shërbimi Spitalor dhe Klinik Universitar i Kosovës (ShSKUK) ka sqaruar opinionin publik lidhur me bashkëpagesën prej 3 euro për 24 orë qëndrim të personave shoqërues mbi moshën 15 vjeç në institucionet spitalore publike.
Sipas komunikatës, ky vendim buron nga Udhëzimi Administrativ për bashkëpagesat për shërbimet shëndetësore. ShSKUK thekson se në Udhëzimin Administrativ paraprak, tarifa për personin shoqërues ka qenë 5 euro për 24 orë, ndërsa me Udhëzimin Administrativ aktual, të miratuar në vitin 2024, kjo shumë është ulur në 3 euro.
Sipas njoftimit, ulja e tarifës është pjesë e rishikimit të përgjithshëm të politikës së bashkëpagesave, përmes së cilës, siç thuhet, jo vetëm që është reduktuar kjo tarifë, por sistemi publik shëndetësor në Kosovë vazhdon të ofrojë shumicën dërrmuese të shërbimeve pa pagesë për qytetarët.
Më tej, bëhet e ditur se si rezultat i Udhëzimit të ri Administrativ për bashkëpagesa, shumë shërbime shëndetësore ofrohen me kosto mbi dhjetëfish më të ulët krahasuar me Udhëzimin Administrativ paraprak.
ShSKUK sqaron se kjo bashkëpagesë nuk aplikohet për pacientin, por lidhet me shfrytëzimin e hapësirave dhe resurseve spitalore nga persona që nuk janë pacientë.
Përjashtim nga kjo bashkëpagesë bëjnë Klinika e Onkologjisë dhe klinikat ku trajtohen pacientë me sëmundje malinje, pavarësisht nëse pacientët janë të hospitalizuar edhe në klinika të tjera brenda Qendra Klinike Universitare e Kosovës (QKUK).
Sa i përket pacientëve me sëmundje kronike, menaxhmenti i QKUK-së bën të ditur se është duke zhvilluar diskutime të brendshme dhe ndërinstitucionale lidhur me trajtimin e bashkëpagesave për këtë kategori, me synim adresimin e nevojave specifike të tyre.
Në fund, theksohet se roli i personit shoqërues është mbështetës dhe emocional, ndërsa kujdesi shëndetësor mbetet përgjegjësi e stafit profesional. Sipas ShSKUK-së, çdo pretendim për mangësi në ofrimin e shërbimeve duhet të trajtohet përmes mekanizmave institucionalë dhe jo të përgjithësohet.
