Gazetari Valon A. Syla ka komentuar atë që u përfol në media për mundësinë që dikush nga familja Jashari të bëhet president i vendit, ku sipas tij një rregull në politikë është që ai që emërohet para kohe për poste publike zakonisht nuk zgjidhet.
Syla vlerësoi se kosovarët janë popull shumë entuziast, ndërsa theksoi se entuziazmi është shenjë e amatorizmit.
“A u kry, Bac? A i shpallët Jasharët presidentë? Sa popull entuziast janë kosovarët. E për ata që s’e dinë – entuziazmi është shenjë e amatorizmit, se profesionisti nuk ka fort entuziazëm, por me krye të ftohtë e mbyll punën. Të gjithë i dhanë zor dhe e shpallën president dikë, që hala s’po e dinë cili bash nga familja Jashari. Një rregull i pashkruar në politikë thotë se ai që emërohet para kohe për poste publike, zakonisht nuk zgjidhet. Dhe ky entuziazëm dhe falsitet i politikës kosovare lehtë mund të përfundojë pa u zgjedhur asnjëri prej Jasharëve”, ka shkruar Syla.
Tutje, sipas tij, kjo tregon më së miri se sa do Albini e Glauku, e të tjerët poshtë e përpjetë, dhe sa e kanë përnjëmend respektin për familjen Jashari.
Ditëve të fundit është hamendësuar që dikush nga familja Jashari të zgjidhet president, por akoma nuk ka pasur ndonjë reagim nga vetë Jasharët.
