Faton Peci nuk është më në krye të Ministrisë së Bujqësisë, ai tashmë drejton Komunën e Mitrovicës, por njerëzit që kanë shërbyer në kabinetin e tij, po emërohen nëpër pozita udhëheqëse në dikasterin që aktualisht drejtohet nga Armend Muja.
Marigonë Shashivari, e cila ka qenë pjesë e ekipit të Pecit gjatë kohës kur i njëjti ishte Ministër i Bujqësisë, është emëruar në pozitën e Zyrtares së lartë për miratimin e projekteve – e cila ka të bëjë me projektet e granteve – në Agjencinë për Zhvillimin e Bujqësisë (AZHB), që operon në kuadër të Ministrisë së Bujqësisë.
Sipas vendimit për pranimin e Shashivarit, i cili mban datën 18 shkurt 2026, Komisioni e ka vlerësuar atë me 80.26 pikë. Të gjitha këto pikë i ka marrë në intervistën me gojë.
Për këtë pozitë, gjashtë kandidatë kanë qenë të përzgjedhur për intervistë. Dy prej tyre nuk kanë marrë pjesë në intervistë. Nga katër të tjerët, vetëm dy kanë arritur që ta kalojnë pragun dhe njëri prej tyre, në këtë rast Marigonë Shashivari, është përzgjedhur.
Shashivari në Facebook ka qenë tejet aktive në postime përkrahëse për Pecin. Më 12 shtator të vitit të kaluar, kur Peci kishte shpërndarë një video lamtumirëse drejtuar fermerëve, pasi që ishte zyrtarizuar si kandidat për Kryetar të Mitrovicës, Shashivari e kishte shpërndarë dhe kishte shkruar se e ka “pasur privilegjin të jem pjesë e kabinetit” të tij.
Përkundër lidhjes së qartë politike, Luan Sylaj, Kryeshef në AZHB, nuk konsideron që ka konflikt interesi dhe shton se nuk ka pasur ndërhyrje që Shasivari të emërohet në këtë pozitë.
“Marigona Shasivari ka qenë pjesë e kabinetit në periudhë të mëhershme… Nuk e konsideroj që ka pasur ndonjë ndërhyrje”, tha Sylaj për VOX Kosova.
“A ka konflikt interesi? Nuk besoj në momentin që nuk është aktualisht pjesë e kabinetit. Ka qenë në ta kaluarën, më herët. Nuk e shoh si ndonjë konflikt interesi përderisa, po besoj kur e kanë përzgjedh për intervistë besoj që ka kualifikimin adekuat edhe ia ka mundësu prezencën në intervistë. Nuk është që shoh ndonjë problem, të paktën nuk shoh kurrfarë konflikti të interesit nëse dikush ka punu për një periudhë të më hershme”, shtoi ai.
Punësimi i njerëzve të kabinetit të tij dhe familjarëve të bashkëpartiakëve në pozita udhëheqëse në Ministri të Bujqësisë ka qenë praktikë e shpeshtë e Pecit gjatë kohës kur drejtonte këtë ministri.
Magbule Hyseni, motra e Ministrit të Punëve të Brendshme, Xhelal Sveçla, ishte punësuar në Agjencinë për Zhvillimin e Bujqësisë si Zyrtare e Lartë e Pagesave Direkte në Drejtorinë e Pagesave Direkte më 1 shkurt 2022.
Asistenten ekzekutive, Verona Menxhiqi, më 16 korrik 2024, e bëri Zyrtare të Lartë Ligjore në Departamentin Ligjor të Ministrisë së Bujqësisë.
Ish-këshilltari politik, Albert Behrami, më 21 shtator 2024, u emërua Drejtor i Drejtoratit Koordinues Rajonal – Mitrovicë në kuadër të Ministrisë së Bujqësisë.
Asistentja e Pecit, Bleona Krasniqi, më 21 tetor 2024, ishte bërë Zyrtare për Informim në Ministri të Bujqësisë.
Vendimi për emërimin e Krasniqit.
Gjatë kohës kur Peci drejtonte Ministrinë e Bujqësisë, në pozitën e Zyrtares për Arkiv, ishte punësuar edhe Blerta Gashani-Berisha, motra e Blerim Gashanit, bashkëpartiakut të Pecit, i cili në atë kohë mbante pozitën e zëvendësministrit të Punëve të Brendshme.
