Moderatori i emisionit Debat Plus në RTV Dukagjini, Ermal Panduri, ka bërë të ditur disa detaje lidhur me zhvillimet rreth asaj se çka i ka kërkuar kryeministri Albin Kurti Presidentes Osmani gjatë takimit mes tyre.
Gjatë emisionit, Panduri, duke u thirrur në burime të RTV Dukagjini, tha se ofertimi i 30 nënshkrimeve për Vjosa Osmanin kishte një qëllim tjetër politik, që lidhej me krijimin e një gare kundërkandidatësh për postin e presidentit.
Ai ka thënë se këto nënshkrime do të shërbenin që Osmani të dilte kundërkandidate e Glauk Konjufcës, në një skenar ku pritej që të mos sigurohej kuorumi i nevojshëm për zgjedhjen e presidentit, duke krijuar më pas një situatë ku përgjegjësia politike do t’i atribuohej opozitës.
“Siç merr vesh televizioni Dukagjini. Ashtu siç edhe ka deklaruar Arbërie Nagavci, janë ofruar 30 nënshkrime, por për të bërë kundërkandidate të Glauk Konjufcës. Për ta bërë kundërkandidate të Glauk Konjufcës Vjosa Osmanin, në fakt, duke besuar shumë që nuk do të bëhej kuorumi as për të dy, dhe më pas me një dakordim paraprak që: “Hajde shkojmë në këtë formacion dhe më pas e lëmë opozitën fajtore që nuk deshëm me zgjedhë çështjen e Presidentit.”
Sipas tij, Kurti i kishte bërë edhe oferta të tjera Vjosa Osmanit:
“Janë informacione që disponon RTV Dukagjini që Albin Kurti i ka ofruar Ministrinë e Arsimit Vjosa Osmanit dhe i ka thënë: “Nëse formon mirë, të bëj edhe ministre të Punëve të Jashtme.”
