Vendet në Lindjen e Mesme u kanë thënë zyrtarëve europianë se janë të shqetësuara për rrezikun e një lufte civile në Iran si pasojë e konfliktit midis Teheranit dhe Shteteve të Bashkuara dhe Izraelit, tha të enjten shefja e diplomacisë së Bashkimit Europian, Kaja Kallas.
“Kur flasim me vendet në rajon, ato janë gjithashtu të shqetësuara për luftëra civile brenda Iranit për shkak të udhëheqjes së regjimit dhe asaj që po ndodh atje,” tha ajo përpara një video-konference me ministrat e jashtëm të BE-së dhe përfaqësues të Gulf Cooperation Council mbi situatën në Iran dhe në të gjithë Lindjen e Mesme. BE-ja dëshiron të shtyjë përpara një zgjidhje diplomatike.
“Luftërat në të vërtetë përfundojnë me diplomaci dhe duhet të ketë hapësirë për diplomacinë këtu që të dalim nga ky cikël përshkallëzimi”, u tha ajo gazetarëve, përcjell A2 CNN. BE-ja është “jashtëzakonisht e shqetësuar” për sigurinë detare në rajon dhe po përpiqet të mbajë të hapura rrugët detare si Ngushtica e Hormuzit, tha ajo. Megjithatë, meqë BE-ja nuk varet nga nafta e vendeve të Gjirit, sulmet atje nuk kanë pasur ndikim të madh afatshkurtër në sigurinë e furnizimit me naftë për BE-në.
Konflikti është përshkallëzuar gjithashtu një mosmarrëveshje midis Shteteve të Bashkuara dhe Spanjës, pasi Uashingtoni ka kërcënuar të ndërpresë tregtinë me Madridin për shkak të refuzimit të Spanjës për të lejuar avionët amerikanë të përdorin bazat detare dhe ajrore të përbashkëta në jug të Spanjës për ofensivën kundër Teheranit. Spanja ka dënuar bombardimet e Shteteve të Bashkuara dhe Izraelit ndaj Iranit si të pamatura dhe të paligjshme.
Shtëpia e Bardhë tha të mërkurën se Spanja kishte rënë dakord të bashkëpunonte, por Madridi e ka mohuar këtë. E pyetur për këtë përplasje, Kallas tha se shpreson që Uashingtoni do të respektojë marrëveshjen tregtare të arritur vitin e kaluar që vlen për të gjitha shtetet anëtare të BE-së.
