Raportimi i djeshëm i Gazetës Online Veriu.info për operacionin antidrogë të Policisë së Kosovës është konfirmuar sot edhe nga Policia e Kosovës, e cila dje ka arrestuar disa persona nën dyshimin e shpërndarjes së substancave narkotike.
Veriu.info raportoi dje për arrestimin e dy personave në hyrje të qytetit të Vushtrrisë të cilët i kishin ikur policisë me veturën Golf të zi nga Prishtina, e aty u sekuestrua një sasi e narkotikëve.
Policia e Kosovës (PK) njofton se është realizuar operacioni policor i koduar me emrin “Delivery”, si rezultat janë arrestuar katër të dyshuar për shpërndarje të narkotikëve dhe një tjetër për krim kibernetik.
Sot policia bën të ditur se hetuesit e Drejtorisë për Hetimin e Trafikimit me Narkotikë (DHTN) në rajonin e Prishtinës, pas një pune intensive operative në terren dhe grumbullimit të informatave relevante lidhur me aktivitetet kriminale në fushën e narkotikëve, realizuan operacionin anti-drogë “Delivery”.
Sipas Policisë, hetimet fillimisht kanë rezultuar me identifikimin e dy personave të cilët dyshoheshin për shpërndarje të substancave narkotike të llojit marihuanë dhe kokainë në qytetin e Prishtinës.
“Më datë 25.03.2026, rreth orës 14:00, është zbatuar një plan taktik operacional, ku të dyshuarit janë lokalizuar në dalje të autostradës në Veternik, duke lëvizur me një veturë të tipit Golf 8 me targa vendore. Me të vërejtur prezencën e policisë, të njëjtit kanë tentuar të ikin me shpejtësi të lartë, duke rrezikuar seriozisht sigurinë në komunikacion. Gjatë ndjekjes, të dyshuarit kanë lëvizur në drejtim të Fushë-Kosovës, më pas drejt Podujevës, për t’u kthyer sërish në magjistralen Prishtinë–Mitrovicë. Ndjekja ka përfunduar në hyrje të qytetit të Vushtrrisë, ku njësitë policore kanë arritur t’i ndalojnë dhe arrestojnë të dyshuarit”, thuhet në njoftim.
Veriu.info kishte publikuar pamje ekskluzive të këtij aksioni që i gjeni më poshtë.
Bëhet e ditur se gjatë kontrollit të veturës janë gjetur dhe sekuestruar: dy paketime me substancë të dyshuar narkotike të llojit marihuanë me peshë totale prej 2,221 gramësh, një cigare e mbushur me marihuanë me peshë 1.5 gram. Po ashtu, gjatë rrugës së ikjes, në fshatin Raskovë, thuhet se është gjetur një paketim tjetër me marihuanë me peshë 1,117.5 gram, i cili dyshohet se është hedhur nga të dyshuarit gjatë ndjekjes.
