Profesori Fadil Maloku në emisionin Gazeta tha se skena politike në Kosovë përfshin kategori të elektoratit që, sipas tij, janë të vetëdijshme dhe me prirje të qarta politike.
Ai theksoi se Albin Kurti i fitoi zgjedhjet me konceptin e shtrirjes së sovranitetit dhe me idenë për “republikën e tretë”, por shtoi se ky projekt, sipas tij, mund të shtyhet përkohësisht në funksion të krijimit të një konsensusi më të gjerë politik.
Sipas Malokut, formimi i një koalicioni dhe gjetja e një gjuhe të përbashkët mes partive do ta bënte më të lehtë realizimin e këtij misioni dhe objektivave afatgjata.
Ai shtoi se ekziston një bazë e përbashkët mes Lëvizjes Vetëvendosje dhe Partisë Demokratike të Kosovës, duke theksuar se një pjesë e elektoratit të kësaj të fundit rrjedh nga Ushtria Çlirimtare e Kosovës, ndërsa sipas tij, afërsitë ideologjike mund të shërbejnë si bazë për bashkëpunim politik në të ardhmen.
“PDK e ka elektoratin e vet, kryesisht, këta të PDK-së vijnë edhe prej UÇK-së, por edhe ideologjia i bashkon Vetëvendosjen dhe PDK-në.”, tha tutje Maloku. /Gazeta 10
