Tri fshatra të Kamenicës: Shipashnicë, Topanicë dhe Rogoqicë kanë qenë cak i vjedhjeve gjatë ditëve të fundit.
Por këtë herë, shënjestër nuk kanë qenë shtëpitë e zakonshme, por objektet fetare, konkretisht xhamitë.
Në fshatin Shipashnicë e Poshtme, një qytetar ka raportuar se përmes kamerave të sigurisë ka vërejtur një person që kishte hyrë në xhami, kishte thyer kasafortën dhe kishte marrë rreth 300 euro para të gatshme.
Sipas njoftimit të policisë, rasti është raportuar, më 6 prill, ndërsa ngjarja dyshohet të ketë ndodhur më herët. Lidhur me këtë rast, është njoftuar prokurori dhe hetimet janë në zhvillim.
Ndërkohë, në fshatin Topanicë, imami i xhamisë ka raportuar se persona të panjohur kishin thyer kasafortën e objektit fetar, por nuk kishin arritur të merrnin asgjë nga aty. Edhe ky rast është duke u trajtuar nga organet e drejtësisë.
Një tentativë e ngjashme është regjistruar edhe në fshatin Rogoqicë, ku sipas raportimit, një person kishte hyrë në xhami dhe kishte tentuar të thyente kasafortën me mjete të forta, por pa sukses. Kasaforta është dëmtuar, por nuk është arritur të hapej.
Për të tri rastet është njoftuar prokurori, ndërsa Policia e Kosovës ka nisur hetimet për identifikimin e të dyshuarve.
