Një lidhje dashurie që kishte zgjatur vetëm disa muaj ka përfunduar me kërcënime serioze dhe ndërhyrje të policisë në Prishtinë.
Ngjarja është raportuar më 13.04.2026 rreth orës 01:00 në Stacionin Policor “Veriu”, nga ankuesi F.G.
Siç mëson Sinjali, ai ka deklaruar se ai dhe familja e tij kanë marrë kërcënime nga Mentor Avdullahu (23-vjeçar).
Sipas tij, i dyshuari kishte qenë në një lidhje dashurie për rreth tre muaj me kushërirën e tij, V. G (23-vjeçar), por lidhja ishte ndërprerë për arsye personale.
Pas ndërprerjes së lidhjes, sipas ankuesit, situata ka eskaluar dhe i dyshuari ka nisur të dërgojë vazhdimisht mesazhe kërcënuese, duke targetuar familjen e V.
Sinjali mëson se lidhur me këtë rast është intervistuar edhe vetë V. G, e cila ka paraqitur si prova mesazhet dhe bisedat që dëshmojnë kërcënimet e pretenduara.
Policia ka arritur të sigurojë edhe prezencën e të dyshuarit Mentor Avdullahu, i cili është intervistuar në prani të avokatit mbrojtës.
Lidhur me rastin është kontaktuar Prokurori Kujdestar, i cili ka udhëzuar që rasti të iniciohet si “Kanosje”, ndërsa i dyshuari të dërgohet në mbajtje për 48 orë.
I dyshuari aktualisht ndodhet në ndalim, ndërsa rasti është në procedurë.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
