Një mospërputhje financiare prej miliona eurosh ka vënë përballë një biznes lokal me dy institucionet më të fuqishme financiare në vend: Bankën Qendrore të Kosovës dhe Raiffeisen Bank. Në qendër të këtij skandali është Regjistri i Kredive të Kosovës (CRK), ku subjekti NTP “SHPETA” figuron me një borxh prej 3.3 milionë eurosh, ndonëse sipas dëshmive kontabël, bilanci i tyre është 0.00 euro.
Në një përgjigje për Insajderin, Banka Qendrore e Kosovës ka zgjedhur një gjuhë mbrojtëse, duke ia hedhur përgjegjësinë bankës, por duke pranuar tërthorazi se rasti po shqyrtohet.
“Fillimisht ju njoftojmë se ofruesit e kredive janë përgjegjës për saktësinë dhe plotësinë e informacionit të raportuar në Regjistrin e Kredive (CRK) në pajtueshmëri me kërkesat e Rregullores dhe Udhëzimit të Bankës Qendrore të Republikës së Kosovës (BQK) për Regjistrin e Kredive. Sipas kërkesave rregullative, institucionet kredidhënëse duhet të përditësojnë informatat për kreditë të cilat konsiderohen si joaktive por që edhe më tutje kanë një shumë mbetje të papërfunduar, që përfshinë ekspozimet e kategorizuar si të shlyera apo “written-off’. Këto aspekte janë subjekt i ekzaminimeve dhe mbikëqyrjes së BQK-së, sipas metodologjisë se saj dhe nuk është evidentuar diçka e tillë në rastin që ju po referoheni”, thuhet në përgjigjen e BQK-së.
Përkundër refuzimit për të dhënë detaje specifike, BQK ka pranuar tërthorazi se pretendimet e biznesit po shqyrtohen brenda institucionit, ndonëse rezultatet e këtij procesi mbeten të mbyllura për publikun.
Institucioni ka bërë të ditur se ankesa është trajtuar, por sqaron se institucioni e ka të pamundur të komentojë çështje që janë në proces gjyqësor apo që janë zgjidhur nga autoritetet e drejtësisë.
Megjithatë, rregullatori pranon ekzistencën e një hetimi administrativ.
“Sidoqoftë, elemente të caktuara që pretendohen nga pala janë trajtuar si aspekte mbikëqyrëse, janë në proces të adresimit të brendshëm sipas metodologjisë së punës mbikëqyrëse, por nuk ndërlidhen domosdoshmërish me përgjigje në ankesë apo komunikim shtesë me palën ankuese”, deklaroi BQK.
Përballë fakteve të prezantuara nga biznesi, Raiffeisen Bank ka zgjedhur heshtjen, duke u mbrojtur me faktin se çështja tashmë është në Gjykatën Komerciale.
“Kjo çështje është në shqyrtim pranë Gjykatës Komerciale të Kosovës dhe, për këtë arsye, nuk mund të japim prononcim lidhur me rastin”, tha Flaka zyrtare për Informim.
Për NTP “SHPETA”, kjo është një “vrasje ekonomike”.
Pronari Avni Krasniqi akuzon Bankën Qendrore të Kosovës për mospërdorim të autoritetit mbikëqyrës. Sipas tij, fakti që rasti është në gjykatë nuk i jep të drejtë bankës të raportojë të dhëna të pasakta teknike.
Në deklaratën e tij, ai thotë se kredia është mbyllur me saldo 0.00 € pas realizimit të kolateralit, se paportimi i një ekspozimi milionar është “shumëfish më i lartë se edhe vetë kredia e disbursuar“.
Sipas tij, BQK po shmanget nga verifikimi teknik, duke e lënë biznesin të bllokuar në një “listë të zezë” fiktive.
Nëse brenda 15 ditëve nuk do të ketë një verifikim teknik nga BQK-ja, biznesmeni Avni Krasniqi ka paralajmëruar hapa radikalë. Ai ka bërë të ditur se, në mungesë të një zgjidhjeje nga institucionet vendore, çështja do të dërgohet në instanca ndërkombëtare.
Sipas Krasniqit, mbajtja e një borxhi prej 3.3 milionë eurosh në sistem, kur bilanci real është zero, është e papranueshme dhe kërkon llogaridhënie jashtë kufijve të Kosovës.
