Inspektorati Policor i Kosovës ka rekomandauar suspendimin e togerit të Njësisë Speciale Operative në Mitrovicë nën dyshimin për fotografim dhe incizim të paautorizuar, raporton Gazeta Online Veriu.info.
Veriu.info merr vesh se bëhet fjalë për togerin Muhamed Berisha.
Rasti raportohet të ketë ndodhur më 16.04.2026 , ku në bazë të hetimeve fillestare, ekziston dyshimi i bazuar se Zyrtari Policor me gradën Toger, derisa ishte duke u intervistuar në ambientet e Inspektoratit Policor të Kosovës është hasur duke bërë incizimin e paparalajmëruar të hetuesve dhe procesit të intervistimit.
Me urdhër të Prokurorit të Shtetit nga Prokuroria Themelore në Prishtine, ndaj Togerit, është iniciuar rast penal “Fotografimi dhe Incizimet tjera të paautorizuar” nga neni 202 të Kodit Penal të Republikës së Kosovës.
Rasti dyshohet se ka ndodhur brenda hapësirave të Inspektoratit Policor të Kosovës, ku togeri kishte shkuar për t`u intervistuar në cilësinë e dëshmitarit në një rast që ndërlidhet me një zyrtar tjetër policor i cili është arrestuar muaj më parë për ndërlidhjen e tij me familjen Gërbeshi në Vushtrri.
Në shtator të vitit vitit të kaluar u pat raportuar se si Murat Latifi, polic i Njësisë Speciale Operative është arrestuar nën dyshimin se kishte ofruar të dhëna apo informacione të brendshme policore për disa raste të cilat ishin duke u hetuar ndaj disa anëtarëve të familjes Gërbeshi nga Vushtrria.
Me këto veprime, polici special dyshohet se kishte nxjerrë edhe informacione konfidenciale të policisë të cilat konsiderohen zyrtare.
