Analisti Shenoll Muharremi ka kritikuar Qeverinë e Kosovës për numër të madh të ministrive.
Ai ka krahasuar Kosovën me Gjermaninë, e cila ka numër më të vogël të ministrive.
Në profilin e tij në Facebook, ai ka shkruar se Gjermania me 84.1 milionë banorë ka 16 ministri, kurse Kosova me vetëm rreth 1.5 milionë banorë ka 19 ministri.
“Gjermania me 84.1 milionë banorë i paska vetëm 16 ministri. E Kosova me vetëm rreth 1.5 milionë banorë, 19 ministri. Popullata e Kosovës vetëm sa 1.78% e të Gjermanisë, apo kjo e fundit e ka rreth 98.2% më të madhe popullatën. E për krahasim, Qeveria (tash në dorëheqje) e Kosovës e ka për 18.75% numrin më të madh të ministrive! Aman, mësohuni me u organizu ma mirë. Qeverisë së ardhshme, 10 ministri i mjaftojnë. Qeveri të vogël, por efikase dhe strukturuar mirë. Edhe duhet me kuptu që struktura dhe numri i ministrive të qeverisë nuk duhet me u “vazhdu” nga qeveritë e kaluara me inerci. As Buxheti publik nuk duhet me qenë me inercion”, ka shkruar ai, duke dhënë detaje tjera.
“Ti je aty me zbatu planin dhe objektivat tuaja që i ke premtu, si po don me i zbatu me një strukturë e model të qeverisë që e ka bë tjetërkush? Struktura e Qeverisë, numri i ministrive, Buxheti Publik.. duhen me u bë duke pas parasysh: (1) objektivat dhe prioritetet e partive fituese; (2) resurset ne dispozicion dhe potencialin e vendit; (3) nevojat e vendit. Kur krijohet qeveria e re, duhet prej fillimi me u organizu, varësisht prej çka synohet me u arrit. Nëse energjia është prioritet absolut, duhet me pas ministri të energjisë e ndoshta ai minister me qene edhe zv. kryeministër për shkak të rëndësisë dhe lidhjes së energjisë me sektorë tjerë. Nëse sektori privat, bizneset dhe zëvendësimi i importit janë me rëndësi, duhet me pas ministri për përkrahje të bizneseve etj”, ka shkruar ai.
