Tashmë gjithçka është zyrtare. Ndryshimet në Komunën e Prishtinës janë konfirmuar dhe Gëzim Kastrati është larguar nga pozita, ndonëse ditë më parë kishte mohuar publikisht raportimin e Sinjalit për shkarkimin e tij.
Por zhvillimi mori një kthesë edhe më interesante politike e familjare.
Në vend të tij është emëruar Nora Cimili Gagica, e cila, sipas burimeve të konfirmuara, është gruaja e Blodin Gagicës, ndërsa ky i fundit dhe Gëzim Kastrati janë djem të tezes.
Pra, në fund, i shkarkuari që përpiqej ta paraqiste largimin si “reorganizim” e jo shkarkim, u zëvendësua pikërisht me familjaren e rrethit të tij.
Nora Cimili Gagica nuk është emër i panjohur për komunën. Ajo kishte ushtruar funksion drejtues edhe në mandatin e kaluar si Kryeshefe e “Hortikulturës”, ndërsa sipas burimeve politike, emërimi i saj është shtyrë dhe mbështetur nga PDK-ja.
Kujtojmë se Sinjali kishte raportuar ekskluzivisht për nisjen e shkarkimeve nga Përparim Rama dhe largimin e Gëzim Kastratit nga Drejtoria e Transformimit. Në atë kohë, Kastrati reagoi duke e quajtur lajmin tendencioz dhe të pavërtetë.
Megjithatë, zhvillimet e sotme jo vetëm që konfirmuan raportimin e Sinjalit, por zbuluan edhe prapaskenat politike dhe familjare të zëvendësimit.
