Agim Bahtiri ka reaguar pas deklaratave të ish-deputetes së Lidhja Demokratike e Kosovës, Jehona Lushaku-Sadriu, e cila tha se ai kishte qenë “gjysmë i pirë” në natën kur kërkonte nënshkrime për zgjedhjen e presidentit.
Përmes një reagimi në Facebook, Bahtiri e ka mohuar kategorikisht këtë pretendim, duke e cilësuar deklaratën si “shpifje” dhe “të turpshme”.
“Shpifja jote se unë paskam qenë ‘gjysmë i dehur’ atë natë kur kam ardhur t’i kërkoj nënshkrimet, është e ulët dhe e turpshme dhe për të duhet të kërkosh falje publike”, ka shkruar Bahtiri.
Ai ka akuzuar LDK-në për, siç tha, përpjekje për të fshehur “dështimin politik”.
“Atë natë unë isha në Kuvend për të kërkuar zgjidhje për zgjedhjen e Presidentit, ndërsa ju bredhnit korridoreve duke bërë kalkulime politike dhe duke u tallur para gazetarëve dhe para qytetarëve me një proces kushtetues që vetë e kishit bllokuar”, u shpreh ai.
Bahtiri tha se në mungesë të votave dhe përgjegjësisë politike, sipas tij, LDK-ja ka zgjedhur “shpifjen dhe teatrin mediatik”.
“Mjaft më me përralla e gënjeshtra, se populli ua ka treguar vendin me votë”, shtoi ai.
Në fund të reagimit, Bahtiri paralajmëroi edhe padi ndaj Lushaku-Sadriut nëse ajo nuk kërkon falje publike.
“Zonja Lushaku i ka dy rrugë, ose kërkon falje për shpifjen se kam qenë ‘gjysmë i dehur’ ose shihemi në gjykatë”, ka deklaruar Bahtiri.
