Ushtruesi i detyrës së Kryetarit të Gjykatës Themelore në Mitrovicë, Bekim Veliqi, ka mirëpritur dje në një takim njoftues dy gjyqtarët e rinj, Naim Rexha dhe Eduart Aliu, të cilët janë dekretuar dje nga ushtruesja e detyrës së Presidentes së Republikës së Kosovës, Albulena Haxhi dhe janë angazhuar në degët e Gjykatës në Vushtrri respektivisht në Skenderaj.
U.D. i Kryetarit të Gjykatës i uroi gjyqtarët për dekretimin, duke i inkurajuar që të angazhohen me përkushtim në ushtrimin e detyrës së re dhe duke shprehur gatishmërinë për bashkëpunim në funksion të forcimit të sistemit gjyqësor.
Po ashtu, ai u dëshiroi mirëseardhje dhe suksese në detyrën e re si gjyqtarë, duke theksuar mbështetjen e plotë institucionale për bashkëpunim dhe zhvillim profesional.
Nga gjyqtarët e rinj u kërkua përkushtim dhe angazhim maksimal në punë, me qëllim të ngritjes së efikasitetit dhe cilësisë së shërbimeve për qytetarët e këtij regjioni.
