Një sasi e madhe e barnave pa banderola janë konsiskuar nga Inspektorati Farmaceutik në barnatoren Linda në Prizren.
Sipas dokumeteve të siguruar nga portali Front Online thuhet se më 11 mars 2025, inspektorët Qëndresa Hetemi dhe Edon Muçaj kanë kryer inspektim me miratim në barnatoren “Linda” në Prizren.
Sipas raportit të Inspektoratit Farmaceutik, gjatë kontrollit janë verifikuar dokumentacioni, produktet dhe pajisjet medicinale, stafi profesional, si dhe zbatimi i vendimit të Ministrisë së Shëndetësisë për çmimet e produkteve medicinale.
Në raport thuhet se barnatorja posedonte licencë valide të punës pranë AKPPM-së, ndërsa i pranishëm gjatë inspektimit ishte farmacisti përgjegjës Mr.Ph Berkant Kovaç.
Por, pavarësisht dokumentacionit të licencimit, inspektorët kanë konstatuar shkelje serioze. Gjatë kontrollit në hapësirat e barnatores janë gjetur produkte medicinale të paautorizuara për tregun e Republikës së Kosovës.
Produktet e gjetura janë regjistruar në fletat përmbledhëse të produkteve dhe pajisjeve medicinale të konfiskuara, gjithsej 11 faqe, dhe më pas janë konfiskuar nga Inspektorati Farmaceutik.
Ajo që e bën rastin edhe më serioz është fakti se, sipas raportit, pala nuk ka ofruar dëshmi lidhur me prejardhjen e këtyre produkteve.
Në konstatimet e raportit theksohet se barnatorja “Linda”, me Numër Unik Identifikues 811296509, posedon licencë valide të punës në AKPPM me numër L5-0765/12/10/2018, me pronar dhe farmacist përgjegjës Berkant Kovaç.
“Inspektorati ka konstatuar se barnatorja në momentin e inspektimit ishte e hapur dhe shërbimi farmaceutik ofrohej në prezencë të farmacistit përgjegjës. Megjithatë, gjetja e produkteve të paautorizuara për qarkullim në Kosovë ka bërë që Inspektorati të ndërmarrë masa. Raporti i referohet nenit 16, paragrafi 5, të Udhëzimit Administrativ Nr. 11/2015, ku përcaktohet se produktet dhe pajisjet medicinale që nuk janë në përputhje me legjislacionin në fuqi, apo që hasen në subjekte të palicencuara, duhet të konfiskohen” thuhet në raportin e Inspektoratit.
Po ashtu, sipas raportit, pala ka vepruar në kundërshtim me nenin 14, paragrafi 6, të Ligjit 04/L-190 për Produkte dhe Pajisje Medicinale, i cili përcakton se barnatorja duhet të blejë produkte medicinale vetëm nga entitetet që janë bartëse të licencës farmaceutike për qarkullim me shumicë.
Front Online i ka dërguar pyetje barnatores në fjalë, por as pas disa ditë pritje nuk ka arritur të marrë përgjigjie nga ta.
