Masat kanë nxitur reagime të ndryshme nga njohës të ekonomisë dhe ish-zyrtarë institucionalë. Ish-zëvendësministri i Financave, Fatmir Gashi, vlerëson se ndihmat janë të mirëseardhura për familjet me të ardhura të ulëta në kohë inflacioni, por thekson se efektet ekonomike janë kryesisht afatshkurtra. Sipas tij, pakot sociale nuk adresojnë problemet themelore të ekonomisë, si pagat e ulëta, varësia nga importi dhe mungesa e prodhimit vendor. Ai shton se këto masa mund të interpretohen edhe si veprime me ndikim elektoral.

Kritika më të ashpra ka shprehur profesori i ekonomisë, Shkumbin Misini, i cili vlerëson se shpërndarja e mjeteve financiare pa strategji të qartë ekonomike mund të nxisë inflacionin. Ai deklaron se qeveria duhet të fokusohet më shumë në investime afatgjata, sigurime shëndetësore dhe mbështetje strukturore për qytetarët, duke paralajmëruar rritje të mëtejshme të inflacionit në vitet e ardhshme.

Edhe njohësi i ekonomisë, Arton Muhaxheri, ka kritikuar pakon “Inflacioni 2.0”, duke argumentuar se shpërndarja e 100 eurove nuk ndihmon zhvillimin ekonomik të vendit dhe mund të ndikojë në rritjen e çmimeve. Ai ka ngritur shqetësime edhe për përjashtimin e disa kategorive nga përfitimet, duke kërkuar politika më të qëndrueshme ekonomike dhe paga më dinjitoze për qytetarët.

Në anën tjetër, njohësi i çështjeve ekonomike, Jakup Bellaqa, e konsideron pakon si ndihmë të vonuar, por të nevojshme për qytetarët në kushtet e inflacionit. Ai thekson se, pavarësisht interpretimeve politike, masa synon të zbusë barrën financiare të familjeve dhe të mbrojë standardin jetësor në një periudhë me rritje të lartë të çmimeve./Front Online