Ministri në detyrë i Infrastrukturës dhe Transportit, Dimal Basha, ka marrë pjesë në përurimin e fazës së dytë të rrugës së asfaltuar Sofali–Kolovicë “Abedin Dino”, projekt për të cilin tha se është financuar kryesisht nga Ministria e Infrastrukturës, raporton Ekonomia Online.
Ai tha se rruga e re do të përmirësojë ndërlidhjen mes lagjeve dhe përfshin trotuare në të dy anët, shtigje për biçikleta dhe standarde moderne të infrastrukturës.
“Jemi në një promovim të një rruge tjetër që po bëhet, një rrugë e re që lidh Sofalinë me Kolovicën. Vetëm shiriti qarkullues është 6 metra. Ka trotuare në të dy anët e rrugës: 1.5 metra në njërën anë, 2 metra në anën tjetër. Gjithashtu kemi shtigjet e biçikletave që janë gjithashtu 2 metra. Një rrugë në të cilën janë investuar 2.5 milionë euro. 1 milion euro e gjysmë janë nga Ministria e Infrastrukturës, pra nga Qeveria Kurti. Me këtë, diku 60 për qind e vlerës së këtij projekti është financuar nga Qeveria Kurti”, tha ai.
Basha theksoi se investimet infrastrukturore do të vazhdojnë në të gjitha komunat, pavarësisht përkatësisë politike të qeverisjeve lokale.
“Dhe po besoj që ne do të vazhdojmë të investojmë në çdo komunë tjetër, por njëkohësisht edhe në Prishtinë, për shkak se ne e shohim Prishtinën si pjesë apo qytet si çdo komunë tjetër. Prandaj, investimet tona po bëhen në të gjitha komunat, pa marrë parasysh se kush qeveris aty. Nuk duhet harruar se këto investime gjithashtu vijnë për shkak se është bërë një angazhim i madh i aktivistëve tanë, qendrave tona që i kemi këtu në Prishtinë. E kemi këtu edhe aktivistin, por edhe kandidatin për deputet, zoti Ilir Kërçeli, që bën një punë të shkëlqyeshme, prandaj është një punë e përbashkët. Ne po vazhdojmë me ndihmu komunën e Prishtinës”, u shpreh Basha.
Duke folur për projektet e tjera infrastrukturore në kryeqytet, ai tha se Ministria e Infrastrukturës po bashkëfinancon edhe disa investime të rëndësishme rrugore.
“Kemi edhe projekte të tjera që jo shpesh po marrin lajmin, e sa për informacionin tuaj, unë vetëm desha shpejt t’ju tregoj që: Përveç kësaj rruge ku kemi investu 60 për qind (pra 2.5 milionë euro), është vazhdimi i rrugës ‘Bajram Bahtiri’ me katër korsi. Projekti kushton 2.5 milionë euro, ndërsa 1.4 milionë euro është investim i ministrisë sonë. Ky është te rrethi i Lakrishtes, pra ndërlidhja e unazës së qytetit me rrugën Prishtinë-Fushë Kosovë-Mitrovicë dhe rrethrrotullimi. Komuna e Prishtinës ka ndarë 4 milionë euro, ndërsa financimi nga ne është 1.4 milionë euro. Pra, gjithsej vlera e këtyre kontratave është 9 milionë euro, ku 4.3 milionë euro janë nga ministria jonë, ose diku 47 për qind. Pra, gati gjysma e mjeteve të rrugëve që po bëhen në Prishtinë vijnë nga mjetet që ndahen nga Qeveria Kurti, përkatësisht nga Ministria e Infrastrukturës dhe Transportit”, u shpreh tutje ai.
Ndërkaq, i pyetur rreth autostradës Prishtinë–Gjilan, Basha nuk dha detaje konkrete, por theksoi se të gjitha premtimet e Qeverisë Kurti do të realizohen.
“Këtu jemi në përurimin e rrugës Sofali–Kolovicë, një investim i jashtëzakonshëm dhe i rëndësishëm. Kur të shkojmë atje në Gjilan, do t’i deklarojmë edhe çështjet e tjera dhe projektet e tjera rrugore. Ne nuk do të ndalemi dhe çdo premtim i kryeministrit Kurti do të realizohet, ashtu siç kemi realizuar shumë punë të tjera. Besoj se kemi pasur një qeveri jashtëzakonisht aktive, e cila nuk mund të matet me një çështje të vetme, siç dëgjojmë shpesh nga opozita”, tha Basha.
