Punonjësit e Radio Televizionit të Kosovës kanë protestuar sot në shenjë pakënaqësie ndaj mosalokimit të plotë të pagave për muajin qershor.
Me pankarta ku shkruhej “Duam pagat tona”, “Mos ndëshkoni informimin publik” dhe “Rrogën tonë e kërkojmë, RTK”, tri organizata sindikale Sindikata e Pavarur e RTK-së, Sindikata e Punëtorëve të RTK-së dhe Shoqata Sindikale e Radio Kosovës u bashkuan për të shprehur shqetësimin e tyre lidhur me gjendjen aktuale të transmetuesit publik.
Përfaqësuesit e sindikatave kërkuan ekzekutimin e menjëhershëm të pjesës së mbetur të pagave, si dhe respektimin e të drejtave të punëtorëve.
“Pas çdo punëtori të RTK-së qëndron një familje. Paga nuk është luks. Paga është mjeti me të cilin mbajmë familjet tona dhe sigurojmë jetesën”, deklaruan ata gjatë protestës.
Sipas tyre, kërkesat nuk kanë të bëjnë me privilegje apo favore, por vetëm me realizimin e një të drejte që u takon me ligj.
Në protestë morën pjesë edhe përfaqësues të shoqërisë civile, ndërsa mbështetje shprehën edhe përfaqësuesit e Bashkimit të Sindikatave të Pavarura të Kosovës. Ata theksuan se çdo vonesë apo mosekzekutim i plotë i pagave cenon drejtpërdrejt sigurinë ekonomike dhe dinjitetin e punëtorëve.
Të premten, ushtruesja e detyrës së drejtoreshës së përgjithshme të RTK-së, Zana Spahiu, kishte njoftuar se ishte realizuar pagesa e pjesshme e pagave, në vlerë prej 50 për qind për secilën kategori të stafit.
Në njoftimin e publikuar atë ditë thuhej se pjesa e mbetur e pagave do të ekzekutohej gjatë kësaj jave.
“Pjesën e mbetur të pagave do ta ekzekutojmë gjatë javës së ardhshme, varësisht nga mundësitë financiare që do të krijohen”, thuhej në njoftimin e menaxhmentit.
Spahiu falënderoi punonjësit për mirëkuptimin, durimin dhe mbështetjen e treguar gjatë kësaj periudhe që e cilësoi si sfiduese për RTK-në.
Ndërkohë, menaxhmenti i RTK-së ka bërë të ditur se po vazhdon angazhimet për sigurimin e mjeteve të nevojshme financiare, me qëllim të garantimit të mbarëvajtjes së punës në transmetuesin publik.
