Real Madrid ka identifikuar Joško Gvardiol si objektivin kryesor për repartin defensiv gjatë afatit kalimtar veror, me drejtuesit e klubit që besojnë se mbrojtësi i Manchester City është alternativa më e arritshme nga lista e tyre e dëshirave.
Sipas raportimeve të TEAMtalk, gjiganti madrilen ka vlerësuar edhe mundësinë e transferimit të Riccardo Calafiori dhe Levi Colwill, por negociatat për këta dy lojtarë duken shumë të vështira. Arsyeja kryesore është që Arsenal dhe Chelsea nuk kanë ndërmend të shesin mbrojtësit e tyre të rinj.
Për këtë arsye, Real Madridi ka intensifikuar interesimin për Gvardiolin, i cili prej kohësh konsiderohet si një nga mbrojtësit më të mirë dhe më premtues në futbollin evropian. Kroati ka qenë një figurë e rëndësishme në skuadrën e Manchester Cityt dhe performancat e tij kanë tërhequr vëmendjen e shumë klubeve të mëdha.
Megjithatë, transferimi i tij nuk pritet të jetë i lehtë. Manchester City po punon për t’i ofruar Gvardiolit një kontratë të re afatgjatë, me synimin për të larguar interesimin e klubeve të tjera dhe për ta mbajtur atë si pjesë kyçe të projektit të tyre.
Mbetet të shihet nëse Real Madridi do të arrijë të bindë kampionët e Anglisë për të hapur negociatat, por një gjë është e qartë: Joško Gvardiol është kthyer në prioritetin numër një të “Los Blancos” për përforcimin e mbrojtjes këtë verë.
