Nga 23 deri më 26 qershor 2026, Prishtina do të jetë sërish qendër e diversitetit kulturor dhe dialogut ndërkomunitar përmes edicionit të tetë të Festivalit Multikulturor, një ngjarje katërditore që bashkon artin, kulturën, rininë dhe institucionet publike në një platformë të përbashkët.
Festivali organizohet nga Voice of Roma, Ashkali and Egyptians (VoRAE), në kuadër të Projektit për Drejtësi Sociale, i bashkëzbatuar me HEKS/EPER dhe Terre des hommes Lausanne, dhe i mbështetur nga Agjencia Zvicerane për Zhvillim dhe Bashkëpunim (SDC). Nën moton “Të Festojmë Ngjashmëritë Tona”, festivali synon të promovojë bashkëjetesën, përfshirjen sociale dhe dialogun ndërkulturor përmes aktiviteteve të ndryshme publike dhe artistike..
PROGRAMI KRYESOR
Festivali hapet më 23 qershor me inaugurimin e Ekspozitës Mobile e Qendres Multikulturore KRAH në Sheshin “Adem Jashari”, një ekspozitë që prezanton identitetin, kujtesën kolektive dhe trashëgiminë kulturore të komuniteteve rom, ashkali dhe egjiptian.
Po atë mbrëmje, në Qendrën Barabar do të hapet ekspozita fotografike “Festivali ndër vite”, e cila sjell një retrospektivë vizuale të rrugëtimit të Festivalit Multikulturor përgjatë shtatë edicioneve. Përmes fotografive të përzgjedhura, vizitorët do të kenë mundësinë të rikujtojnë momentet më domethënëse, aktivitetet kulturore, artistike dhe komunitare, si dhe ndikimin që festivali ka pasur në promovimin e dialogut ndërkulturor dhe bashkëjetesës në Kosovë.
Më 24 qershor, programi vazhdon me debatin publik “Stil Jubilee – Dialogue for Equality, Youth Voice and Social Inclusion” në Qendrën e Burimeve Studentore, si dhe me Slam Poetry Night në Termokiss, ku të rinjtë do të interpretojnë krijime artistike mbi identitetin, shoqërinë dhe të ardhmen.
Më 25 qershor, aktivitetet do të fokusohen në fuqizimin ekonomik dhe kreativitetin rinor. Në Hotel Graçanica do të mbahet një dialog ndërmjet sipërmarrësve, institucioneve dhe përfaqësuesve të komuniteteve mbi përfshirjen ekonomike, ndërmarrësinë dhe mundësitë për zhvillim të qëndrueshëm të bizneseve.
Paralelisht, në Qendrën Kulturore KRAH do të organizohet një punëtori kreative ku artistë dhe krijues të rinj do të prezantojnë punimet e tyre artistike dhe do të diskutojnë mbi pjesëmarrjen kulturore, lirinë artistike dhe nevojën për hapësira gjithëpërfshirëse për brezat e rinj.
Po ashtu, një grup i përzgjedhur i të rinjve liderë nga komunitete të ndryshme do të zhvillojë vizita në Presidencën e Kosovës dhe Kuvendin e Kosovës. Kjo vizitë synon të ofrojë mundësi për dialog të drejtpërdrejtë me institucionet, duke nxitur pjesëmarrjen qytetare, angazhimin demokratik dhe përfaqësimin e të rinjve në proceset vendimmarrëse.
Kulmi i festivalit do të mbahet më 26 qershor në Parkun e Gërmisë me aktivitetin “Running with Colours”, një ngjarje publike që bashkon sportin, muzikën dhe komunitetin në një festë gjithëpërfshirëse të diversitetit. Festivali përmbyllet me një koncert të madh në Sheshin “Adem Jashari” me performanca artistike nga grupe të ndryshme kulturore.
QËLLIMI I FESTIVALIT
Festivali Multikulturor synon të krijojë hapësira të hapura ku qytetarët takohen përmes kulturës, artit dhe dialogut, duke forcuar mirëkuptimin ndërmjet komuniteteve dhe duke promovuar një shoqëri më gjithëpërfshirëse dhe të barabartë.
BOILERPLATE (RRETH ORGANIZATORIT)
Zëri i Romëve, Ashkalive dhe Egjiptianëve (VoRAE) është një organizatë joqeveritare e dedikuar për promovimin e barazisë, përfshirjes, të drejtave të njeriut dhe pjesëmarrjes aktive të komunitetit Rom, Ashkali dhe Egjiptian në Kosovë
Përmes avokimit, arsimit, kulturës, angazhimit të të rinjve dhe fuqizimit të komunitetit, VoRAE punon për të ndërtuar një shoqëri më gjithëpërfshirëse dhe multikulturore.
Festivali multikulturor organizohet në kuadër të Projektit të Drejtësisë Sociale, të zbatuar bashkërisht nga VoRAE, HEKS/EPER dhe Terre des hommes Lausanne, me mbështetjen e Agjencisë Zvicerane për Zhvillim dhe Bashkëpunim (SDC) dhe Misionit të Kombeve të Bashkuara në Kosovë (UNMIK).
Projekti përqendrohet në përfshirjen sociale, arsimin, punësimin, transformimin e strehimit, luftën kundër diskriminimit dhe forcimin e mundësive për komunitetet e margjinalizuara.
