Disa lote prodhimi të ujit mineral “Kllokoti” kanë rezultuar me përmbajtje të lartë të Borit (Boron), sipas njoftimit të Sistemit Evropian të Alarmimit të Shpejtë për Ushqim dhe Ushqim për Kafshë (RASFF).
Agjencia e Ushqimit dhe Veterinarisë (AUV), përmes RASFF, është njoftuar për largim nga tregu të produktit “Ujë Mineral” me origjinë nga Kosova. Pas kryerjes së testeve laboratorike, është konstatuar nivel i lartë i Borit (Boron), duke tejkaluar kufijtë e lejuar.
Por cilat janë rreziqet e nivelit të lartë të borit në ujë?
Sipas studimeve mjekësore të konsultuara niveli i lartë i borit në ujin e pijshëm dhe përdorimi i tij për kohë të gjatë mund të shkaktojë probleme riprodhuese, dëmtime të veshkave si dhe çrregullime të mundshme hormonale.
Kurse nëse përdoret në afat të shkurt, niveli i lartë i borit në ujë të pijshëm mund të shkaktojë të përziera dhe të vjella, dhimbje barku, diarre, dhimbje koke si dhe lodhje dhe dobësi.
