U.d presidentja, Albulena Haxhiu, ka pritur sot nëp takim, Valentina Superti, e cila është drejtoreshë për Ballkanin Perëndimor në Komisionin Evropian.
Në komunikatën për media njoftohet se, Haxhiu, ka vlerësuar mbështetjen e vazhdueshme të BE’së për zhvillimin e vendit dhe, ka theksuar ajo, Kosova e ka kthyer këtë mbështetje në institucione demokratike, në reforma dhe në një orientim të qartë evropian.
‘’ Ajo kërkoi që progresi i Kosovës të marrë përgjigje të qartë politike nga Bashkimi Evropian përmes avancimit drejt statusit kandidat dhe hapjes së negociatave të anëtarësimit’’, thuhet mes tjerash në komunikatë.
Komunikatë:
U.D. Presidentja Haxhiu priti në takim znj. Valentina Superti, Drejtoreshë për Ballkanin Perëndimor në Komisionin Evropian
U.D. Presidentja e Republikës së Kosovës, Albulena Haxhiu, priti sot në takim znj. Valentina Superti, Drejtoreshë për Ballkanin Perëndimor në Komisionin Evropian, gjatë vizitës së saj të parë në Kosovë.
U.D. Presidentja Haxhiu vlerësoi mbështetjen e vazhdueshme të BE-së për zhvillimin e vendit dhe theksoi se Kosova e ka kthyer këtë mbështetje në institucione demokratike, në reforma dhe në një orientim të qartë evropian, i cili gëzon mbështetje shumë të lartë qytetare.
U.D. Presidentja theksoi se Kosova ka mbajtur kurs të qartë në reformat evropiane, është plotësisht e harmonizuar me politikën e jashtme dhe të sigurisë të BE-së, dhe po i zbaton me seriozitet obligimet që dalin nga Agjenda e Reformave dhe Plani i Rritjes.
Ajo kërkoi që progresi i Kosovës të marrë përgjigje të qartë politike nga Bashkimi Evropian përmes avancimit drejt statusit kandidat dhe hapjes së negociatave të anëtarësimit.
U.D. Presidentja Haxhiu theksoi gjithashtu rëndësinë e zbatimit të marrëveshjeve të Procesit të Berlinit dhe të bashkëpunimit të barabartë rajonal, ku Kosova duhet të trajtohet me të njëjtën mundësi për përfaqësim, lidhje infrastrukturore, tregti, digjitalizim dhe qasje në iniciativat e tregut të përbashkët.
