Pas rastit të dhunimit të 11-vjeçares në Prishtinë, Kryetari i Prishtinës, Përparim Rama, ka njoftuar se prej sot e tutje hapësirat publike në kryeqytet do të jenë nën vëzhgimin e kamerave.
Rama ka njoftuar se kjo ka qenë një marrëveshje e përbashkët me Policinë e Kosovës, e cila është nënshkruar sot.
“Bashkë me Policinë e Kosovës u zotuam se do të koordinojmë aktivitete të përbashkëta për përmirësimin e sigurisë në hapësirat publike të Kryeqytetit”, njoftoi kryetari në një postim në Facebook.
Kujtojmë se rasti i dhunimit të 11-vjeçares ka ngjallur reagime të shumta në Kosovë, për të cilën edhe u organizuan protesta masive brenda dhe jashtë vendit. E mitura është dhunuar nga pesë të dyshuar për shtatë orë. Të pesë të dyshuarit gjenden aktualisht në paraburgim, derisa tre prej tyre janë të mitur.
Njoftimi i plotë:
Hapësirat publike tani e tutje do të jenë nën vëzhgimin e kamerave!
Sot finalizuam marrëveshjen me Kosovo Police për sistemin e kamerave në hapësirat publike.
Tash e sa kohë jemi në bashkëpunim të ngushtë me Policinë e Kosovës për hartimin e marrëveshjes për vendosjen e sistemit të kamerave dhe mënyrën e mirëmbajtjes së rrjetit të kamerave në hapësirat publike të Kryeqytetit, marrëveshje e cila u nënshkrua sot.
Bashkë me Policinë e Kosovës u zotuam se do të koordinojmë aktivitete të përbashkëta për përmirësimin e sigurisë në hapësirat publike të Kryeqytetit.
