Inspektorati i Tregut në kuadër të MINT ka iniciuar procedurë kundërvajtëse në Gjykatën Themelore në Prishtinë kundër agjencionit turistik “Reisebüro Prishtina International”. Kompania po akuzohet për përhapje të reklamave me përmbajtje mashtruese lidhur me ofertat e fluturimeve, duke shkelur Ligjin për Mbrojtjen e Konsumatorit.
Një ofertë e publikuar në rrjetet sociale më 6 nëntor të vitit të kaluar për linjën e fluturimit “Helsinki-Prishtinë-Helsinki” është bërë shkak që agjencia e udhëtimeve “Reiseburo Prishtina International” të përfundojë në gjykatë.
Inspektorati i Tregut ka dorëzuar tashmë kërkesën për fillimin e procedurës për kundërvajtje në Gjykatën Themelore në Prishtinë, pasi zbuluan se kompania ka përdorur taktika mashtruese për të joshur klientët.
Sipas dokumenteve që ka siguruar Gazeta Insajderi, përmes kërkesës për qasje në dokumente zyrtare, agjencia në fjalë kishte reklamuar një kupon zbritjeje me kodin “SALE2026”, duke u premtuar qytetarëve zbritje për çdo rezervim.
Mirëpo, pas ankesës së një konsumatori dhe inspektimeve në terren të kryera nga inspektorët shtetërorë, ka rezultuar se e gjithë kjo ishte një mashtrim, pasi përqindja e zbritjes nuk ishin specifikuar.
“Inspektorati i Tregut konsideron se subjekti afarist në fjalë, me anë të reklamave, ka përhapur mesazhe të pavërteta tek qytetarët me informata dhe përmbajtje mashtruese, dhe i njëjti shkakton apo mund të shkaktojë huti te konsumatori duke mos cekur nivelin e përqindjes së zbritjes”, thuhet në kërkesën e Inspektoratit drejtuar Gjykatës.
Në vendimin e Inspektoratit, saktësohet se veprimet e agjencionit “Reisebüro Prishtina International”, me drejtore Agnesa Aliji, bien ndesh me nenin 13 (paragrafi 1), nenin 9 (paragrafi 1) si dhe nenin 31 të Ligjit Nr. 06/L-0334 “Për Mbrojtjen e Konsumatorit”.
Për këto shkelje, Inspektorati i Tregut ka kërkuar nga Gjykata Themelore që ndaj këtij subjekti afarist të merren masa ndëshkimore të parapara me ligjet në fuqi.
Lidhur me këtë nismë të Inspektoratit të Tregut dhe akuzat për mashtrim të konsumatorëve, Gazeta Insajderi ka tentuar të marrë një koment nga kompania “Reisebüro Prishtina International”, por deri në publikimin e artikullit nuk kanë kthyer përgjigje.
