Bedri Hamza, kryetari i Partisë Demokratike të Kosovës (PDK), priti të premten në takim ambasadorin jo-rezident të Republikës së Irlandës për Kosovën, Ragnar Almqvist, me të cilin diskutoi për zhvillimet politike në vend, procesin e integrimit evropian dhe marrëdhëniet ndërmjet Kosovës dhe Irlandës.
Sipas një njoftimi të PDK-së, Hamza shprehu mirënjohje për mbështetjen e vazhdueshme që Irlanda i ka dhënë Kosovës, duke vlerësuar njëherësh edhe prioritetet e këtij shteti në cilësinë e kryesuesit të Këshillit të Bashkimit Evropian. Ai theksoi se Irlanda mbetet një model frymëzues për zhvillimin ekonomik dhe mirëqenien e qytetarëve.
Gjatë takimit u diskutua edhe për situatën politike pas zgjedhjeve, ku Hamza theksoi nevojën urgjente për formimin sa më të shpejtë të institucioneve të reja të vendit.
Ai po ashtu nënvizoi se PDK mbështet avancimin e vendeve të Ballkanit Perëndimor drejt Bashkimit Evropian dhe kërkon që Kosovës t’i jepet statusi i vendit kandidat.
Në përmbyllje të takimit, Hamza ritheksoi se orientimi strategjik i Kosovës mbetet i pandryshuar, me synimin për anëtarësim të plotë në NATO dhe në Bashkimin Evropian.
