Departamenti i Shtetit Amerikan, ka publikuar deklaratë të përbashkët të Shteteve të Bashkuara të Amerikës dhe Serbisë, me rastin e Dialogut të parë Strategjik SHBA–Serbi.
Në deklaratë thuhet se, dialogu shënon një synim ‘’ të përbashkët për forcimin e partneritetit ndërmjet Shteteve të Bashkuara dhe Serbisë dhe rritjen e bashkëpunimit dypalësh për promovimin e paqes, sigurisë dhe prosperitetit’’.
Aty thuhet edhe se SHBA’të dhe Serbia nënshkruajten një Memorandum Mirëkuptimi për infrastrukturën energjetike dhe sigurinë rajonale të energjisë.
Dy vendet mirëpritën gjithashtu njoftimin për një garanci kredie prej 50 milionë dollarësh nga Banka e Eksport-Importit të Shteteve të Bashkuara për grupin Telekom Srbija, për zhvillimin e rrjetit 5G të Serbisë duke përdorur furnizues të besueshëm, duke rritur sigurinë dhe besueshmërinë e sistemeve të komunikimit në Serbi’’, thuhet mes tjerash në deklaratë.
Më tej, njoftohet edhe për bashkëpunimin në siguri dhe mbrojtje, ku thuhet se, SHBA’të dhe Serbia riafirmuan angazhimin e tyre të përbashkët për ruajtjen e paqes dhe sigurisë rajonale dhe u zotuan të rrisin ritmin e angazhimeve ushtarake dypalëshe.
Deklarata:
Sekretari amerikan i Shtetit Marco Rubio dhe ministri i Punëve të Jashtme i Serbisë Marko Gjuriq udhëhoqën Dialogun e parë Strategjik SHBA–Serbi në Uashington më 17 korrik.
Dialogu Strategjik shënoi një synim të përbashkët për forcimin e partneritetit ndërmjet Shteteve të Bashkuara dhe Serbisë dhe rritjen e bashkëpunimit dypalësh për promovimin e paqes, sigurisë dhe prosperitetit, ndërsa të dyja vendet po shënojnë 145-vjetorin e marrëdhënieve diplomatike.
Bashkëpunimi në energji dhe ekonomi
Shtetet e Bashkuara dhe Serbia nënshkruan një Memorandum Mirëkuptimi për infrastrukturën energjetike dhe sigurinë rajonale të energjisë.
Shtetet e Bashkuara gjithashtu mirëpritën vendimin paraprak të Serbisë për të vazhduar me projektin hidroenergjetik Gjerdap III (Porta e Hekurt III), si projekti i parë i identifikuar në kuadër të Marrëveshjes Ndërqeveritare për Energjinë.
Ky projekt paraqet një investim të rëndësishëm në infrastrukturën energjetike rajonale dhe një hap drejt një Serbie më të pavarur në aspektin energjetik.
Dy vendet mirëpritën gjithashtu njoftimin për një garanci kredie prej 50 milionë dollarësh nga Banka e Eksport-Importit të Shteteve të Bashkuara për grupin Telekom Srbija, për zhvillimin e rrjetit 5G të Serbisë duke përdorur furnizues të besueshëm, duke rritur sigurinë dhe besueshmërinë e sistemeve të komunikimit në Serbi.
Bashkëpunimi në siguri dhe mbrojtje
Shtetet e Bashkuara dhe Serbia riafirmuan angazhimin e tyre të përbashkët për ruajtjen e paqes dhe sigurisë rajonale dhe u zotuan të rrisin ritmin e angazhimeve ushtarake dypalëshe.
Të dyja vendet vlerësuan 20 vjet bashkëpunim të ngushtë ndërmjet Gardës Kombëtare të Ohajos dhe Forcave të Armatosura të Serbisë, në kuadër të Programit të Partneritetit Shtetëror.
Serbia ka kërkuar blerjen e pajisjeve mbrojtëse amerikane, të cilat do të shërbejnë për rritjen e ndërveprueshmërisë së forcave të armatosura të të dy vendeve dhe për ndërtimin mbi marrëdhëniet e krijuara gjatë ushtrimeve dypalëshe e shumëpalëshe dhe misioneve të përbashkëta paqeruajtëse.
Gjithashtu, Departamenti i Shtetit njoftoi se ka ndarë 1.5 milionë dollarë për vazhdimin e bashkëpunimit në fushën e çminimit civil, me qëllim pastrimin e zonave nga minat tokësore dhe mjetet shpërthyese të pashpërthyera.
Shtetet e Bashkuara shprehën ngushëllimet e tyre të thella për humbjen në muajin qershor të një paqeruajtësi serb që shërbente në Misionin e Përkohshëm të Kombeve të Bashkuara në Liban (UNIFIL).
Shkenca dhe teknologjia
Shtetet e Bashkuara mirëpritën vendimin e Serbisë për t’iu bashkuar Marrëveshjeve Artemis (Artemis Accords).
Këto janë një grup parimesh për eksplorimin dhe përdorimin civil të hapësirës në mënyrë transparente, të sigurt dhe të përgjegjshme, të cilat do të mundësojnë zgjerimin e bashkëpunimit paqësor në hapësirën e thellë përmes shkëmbimit të njohurive dhe të dhënave shkencore.
Nisma të tjera dypalëshe
Shtetet e Bashkuara dhe Serbia nënshkruan një Memorandum Mirëkuptimi për ndarjen e kostove të programit Fulbright.
Angazhimi i Serbisë për të kontribuar me 300 mijë dollarë në vit për mbështetjen e zgjerimit të këtij programi historik të shkëmbimit do të krijojë mundësi shtesë për studiues dhe studentë të dalluar amerikanë e serbë që të japin mësim dhe të kryejnë kërkime në dobi të të dy vendeve.
Shtetet e Bashkuara rikonfirmuan angazhimin e tyre, të formalizuar gjatë vizitës në maj 2026 të nënsekretares për Diplomaci Publike Sarah Rogers, për të marrë pjesë në Expo 2027 në Beograd, një ngjarje historike dhe ekspozita e parë e specializuar që do të mbahet në Ballkanin Perëndimor.
Shtetet e Bashkuara mirëpritën gjithashtu gatishmërinë e Serbisë për të shqyrtuar mundësinë e bashkimit me Praktikat më të Mira për Parimet e Uashingtonit mbi Artin e Konfiskuar nga Nazistët.
Serbia njoftoi synimin e saj për të thelluar marrëdhëniet dhe angazhimin me Shtetet e Bashkuara përmes hapjes së konsullatave të reja në Miami dhe San Francisko.
