Mirjeta Durmishi, gruaja e Hysen Durmishit, ish-Ministër i Infrastrukturës, është emëruar këshilltare e Ministrit në detyrë të Shëndetësisë, Arben Vitia.
Lajmi është bërë i ditur nga vetë Durmishi, përmes një postimi në Facebook, ku e ka falënderuar Kryeministrin në detyrë, Albin Kurti, dhe Ministrin Vitia.
“Faleminderit kryeministër Kurti! Faleminderit ministër Vitia! Jam e nderuar, që nga sot, të jem këshilltare politike e ministrit më të suksesshëm të Qeverisë së Kosovës z. Arben Vitia”, shkroi Durmishi.
Pasi që burri i saj nuk u bë Ministër në Qeverinë Kurti 3, Mirjeta e ka thumbuar e kritikuar vazhdimisht ekzekutivin e Kurtit.
“Vështirë është me përfundu ndërtimin e rrugës, se me pre shiritin është lehtë”, kishte shkruar ajo në Facebook më 19 mars, derisa kishte shpërndarë një fotografi të Kurtit me Ministrin e Infrastrukturës, Dimal Basha – pasuesin e burrit të saj në Ministri – duke prerë shiritin gjatë përurimit të një rruge.
Ajo kishte reaguar edhe kur iu ishin publikuar disa fotografi Ministrit Basha me pronarin e HIB Petrol-it, Kujtim Bucaliun.
“Unë kam mendu që Dimali tash veç me pi kafen në zyre, pasi që e blejti aparatin e kafes, por jo, ky edhe në darka me oligarkë po dilka”, shkruante Durmishi më 23 prill.
Kritikë tjetër ndaj Qeverisë, ajo kishte bërë edhe për ekspozitën skandaloze për Masakrat në Kosovë me autor Shkelzen Gashi – e financuar nga institucionet shtetërore – ku ishin paraqitur të dhëna të pasakta për masakrat.
“Më e keqja është se bartëse të institucioneve shtetërore, vizitojnë ekspozitën vetëm sa për të bërë foto dhe krenarë për financimin e saj, e nuk lodhen fare për përmbajtjen. S’e di ku e marrin këtë vetëbesim për udhëheqje”, shkruante ajo më 28 mars.
Në Qeverinë Kurti 2, Hysen Durmishi kishte shërbyer si zëvendësministër në Ministrinë e Mjedisit, Planifikimit Hapësinor dhe Infrastrukturës, për t’u emëruar si ushtrues i detyrës së Ministrit më 27 gusht 2025. Në këtë pozitë, ai u emërua pas dorëheqjes së Liburn Aliut.
Por, në Qeverinë Kurti 3, Durmishi u la jashtë. Ai mbeti vetëm deputet, pasi që në pozitën e Ministrit të Infrastrukturës u emërua Dimal Basha.
Madje, Durmishi, një nga anëtarët më të vjetër të VV-së, nuk kishte qenë pjesë e listës së kandidatëve të VV-së për deputet në zgjedhjet e 7 qershorit.
