Kryetari i LDK-së po pret një raport përmes të cilit do të njoftohet zyrtarisht për nismën për largimin e tij nga drejtimi i partisë. Lumir Abdixhiku pritet ta marrë një vendim më pas për datën e mbajtjes së Kuvendit të jashtëzakonshëm të LDK-së, ku do të testohet besimi brendapartiak ndaj tij.
Në Lidhjen Demokratike të Kosovës po përgatitet raporti për kërkesën e rreth 150 delegatëve për shkarkimin e kryetarit të partisë, Lumir Abdixhiku.
Sekretari i përgjithshëm i LDK-së, Ilir Ferati i tha Gazetës Express se ende s’e kanë njoftuar Abdixhikun formalisht për nënshkrimet.
“Jo ende s’e kemi njoftuar zyrtarisht”, tha ai.
Ferati tha se po përgatisin një raport që do t’i dorëzohet kryetarit të LDK-së.
“Jemi në pergatitje të raportit, i cili përfshin jo vetëm nënshkrimet, por edhe elemente teknike”, tha ai.
Ai tha se nuk i takon atij ta thotë, kur u pyet nëse Kuvendi i jashtëzakonshëm i partisë do të mbahet javën e ardhshme.
“Është në diskrecion të kryetarit ta caktojë se kur është më e përshtatshme”, tha Ferati.
Dje u verifikuan nënshkrimet e rreth 150 delegatëve të LDK-së që kërkojnë shkarkimin e kryetarit të partisë. Një javë më parë, nënshkrimet u dorëzuan në selinë qendrore të kësaj partie.
Pasi Abdixhiku të njoftohet zyrtarisht për verifikimin e nënshkrimeve, ai duhet ta caktojë datën e mbajtjes së Kuvendit të jashtëzakonshëm, ku do të testohet besimi brendapartiak ndaj tij.
Para një jave në LDK nisi zyrtarisht nisma e brendshme për shkarkimin e kryetarit, me deputetin e zgjedhur, Armend Zemaj, dhe kryetarin e degës së dytë të kësaj partie në Prishtinë, Florian Dushi, të cilët i dorëzuan nënshkrimet e grumbulluara.
Ditën kur u dorëzua kërkesa për shkarkimin e kryetarit, Abdixhiku njoftoi vetë në Facebook se ishin deponuar “148 nënshkrime të delegatëve” dhe se nisma bënte thirrje për mbajtjen e Kuvendit të jashtëzakonshëm me kërkesën kryesore – largimin e tij nga karrigia e të parit në LDK.
Për shkak të kësaj nisme, Abdixhiku javën e kaluar i pezulloi bisedimet me Lëvizjen Vetëvendosje për formimin e institucioneve të reja.
“Në këtë pikë, më duhet po ashtu t’i njoftoj qytetarët e vendit tim se për shkak të kësaj nisme, detyrohem t’i ndërpres të gjitha angazhimet për formimin e institucioneve të Republikës që i prisni me të drejtë tash e sa kohë”, ka thënë ai në një video-mesazh në Facebook. Në këto rrethana, Abdixhiku ka thënë se “s’do të ishte as serioze dhe as e përgjegjshme” që ai të vazhdonte të negocionte në emër të LDK-së, ndërkohë që mandati i tij për të udhëhequr me partinë “është vënë në diskutim nga brenda shtëpisë”.
Ai ka thënë se nuk dëshiron të besojë se bisedimet me LVV-në ishin arsyeja e “ngutisë për Kuvend të paprecedent”.
Nga këto zhvillime, sipas tij, “qytetarët e Kosovës do të pësojnë më së shumti” dhe “LDK bashkë me ta”, pasi, ato vijnë “në një moment shumë kritik” për këtë parti dhe për vendin. Ky proces i brendshëm, sipas Abdiixhikut mund ta dëmtojë LDK-në “pariparueshëm nga brenda dhe ta lë Kosovën pa institucione dhe potencialisht përballë zgjedhjeve të reja në vjeshtë”.
Abdixhiku ka thënë se nuk ka frikë “nga vota e vendimi i delegatëve”, ndërsa ka përmendur “apetite” të kundërshtarëve të tij brenda partisë për “ta marrë karrigen e kryetarit”.
Anëtari i Kryesisë së LDK-së, Shkëmb Manaj, tha mbrëmë në RTV21 se Kuvendi do të mbahet “para seancës konstituive” të Kuvendit, e cila duhet të mbahet më së largu deri në fund të javës së parë të gushtit.
Kuvendi i jashtëzakonshëm i LDK-së duhet të mbahet 60 ditë nga dita e dorëzimit të nënshkrimeve, sipas statutit të kësaj partie.
Kuvendi i LDK-së i ka 355 delegatë, përfshirë kryetarin.
