Veprimtaria e shumë prej institucioneve private shëndetësore në Kosovë është kthyer në sfidë për shtetin, pasi që ato po operojnë vazhdimisht në mënyrë të kundërligjshme me shërbime të palicencuara dhe staf ilegal (të palicencuar), gjë që paraqet edhe rrezik për shëndetin dhe jetën e pacientëve.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin laboratori mjekësor biokimik hematologjik “Pinea Medical Center Healthcare” është gjobitur me 2 mijë euro për shkelje të dispozitave të Ligjit për Shëndetësi.
Në arsyetimin e vendimit të siguruar nga Veriu.info që mban datën 10 qershor 2026, thuhet se Inspektorati Shëndetësor ka realizuar inspektim më 20 maj në “Pinea Medical Center Healthcare”, ku ka gjetur se teknik-laborantja mjekësore Mollza Abiti nuk ishte e lajmëruar në Divizionin për Licencim dhe Akreditim të Ministrisë së Shëndetësisë, që nënkupton se ka punuar pa licencë e rrjedhimisht në mënyrë të kundërligjshme.
Gjatë inspektimit është zbuluar se “Pinea Medical Center Healthcare” ka kryer pa licencim shërbime laboratorike të avancuara të natyrës molekulare/gjenetike, pasi që këto shërbime nuk i ka pasur të lajmëruara dhe regjistruara në Ministrinë e Shëndetësisë.
Inspektorati Shëndetësor ka evidentuar se “Pinea Medical Center Healthcare” ka bërë edhe shkelje tjera ligjore, pasi që ka gjetur mospërputhje ndërmjet shërbimeve të paraqitura në çmimore dhe shërbimeve të deklaruara pranë organit kompetent (v.j. DLA/MSh)
“Institucioni privat shëndetësor “Pinea Medical Center Healthcare” – Ambulancë Shëndetësore dhe Laborator Mjekësor Biokimik Hematologjik, Fushë Kosovë, me themelues Besart Shala ka shkelur dispozitat ligjore në fuqi Nenin 42, paragrafi 1, të Ligjit Nr. 04/L-125 për Shëndetësi …”, thuhet në fund të arsyetimit të vendimit me të cilin është gjobitur ky institucion privat shëndetësor me pronar Besart Shalën.
Çka thotë “Pinea Medical Center Healthcare”?
Veriu.info ka marrë edhe qëndrimin e “Pinea Medical Center Healthcare” në lidhje me gjobën që ka marrë për shkeljen e Ligjit për Shëndetësi, ku nga ky institucion privat shëndetësor pranojnë se kanë pasur staf të palicencuar, por pretendojnë se Mollza Abiti ishte punësuar në muajin që është bërë inspektimi dhe e njëjta më pas është licencuar në DLA/MSh.
“Lidhur me pyetjet e adresuara, dëshirojmë të sqarojmë se Pinea Medical Center Healthcare në Fushë Kosovë nuk ka kryer analizat laboratorike për profilet për të cilat është ngritur çështja. Roli i kësaj njësie ka qenë ekskluzivisht pranimi dhe administrimi i mostrave nga pacientët, ndërsa të gjitha mostrat për profilet molekulare/gjenetike dhe analizat e tjera pėrkatëse mikrobiologjike janë transportuar dhe janë pėrpunuar në Pinea Medical Center – Qendra Kryesore, e cila posedon licencat dhe autorizimet përkatëse për ofrimin e këtyre shërbimeve. Prandaj, nuk kemi ofruar shërbime laboratorike të palicencuara në njësinë e Fushë Kosovës, por kemi vepruar në kuadër të organizimit të brendshëm të rrjetit tonë të shërbimeve, ku analizat janë realizuar vetëm në njësinë e licencuar”, thuhet në përgjigjen e tyre për Veriu.info.
“Pinea Medical Center Healthcare” për angazhimin e stafit të palicencuar jep një përgjigje pa sens, duke u munduar të arsyetohet se teknik-laborantja ka qenë në muajin e parë të punës, por që nuk specifikon faktin se një profesioniste shëndetësore duhet paraprakisht të licencohet në DLA/MSh e pastaj të nis punën.
“Sa i përket znj. Mollza Abiti, sqarojmë se ajo është pjesë e stafit tė laboratorit të Pinea Medical Center Healthcare-Fushë Kosovë dhe është punësuar gjatë muajit përkatës në të cilin është kryer inspektimi. Në momentin e inspektimit, procedurat administrative për evidentimin e saj në sistemet përkatëse ishin në proces. Znj. Mollza Abiti është bartëse e licencës profesionale me nr. KO-502205/A-05-8, ndërsa aktualisht ajo figuron e regjistruar dhe e pranuar si pjesë e stafit nga Ministria e Shėndetėsisė”, thuhet në përgjigje.
Në fund të përgjigjes “Pinea Medical Center Healthcare” thotë se respektojnë standardet profesionale, por që pikërisht për shkeljen e tyre është gjobitur nga Inspektorati Shëndetësor i Ministrisë së Shëndetësisë.
LEXONI EDHE:
